Андрэй Саннікаў: Нобелеўская прэмія Святлане Алексіевіч - гэта велізарная радасць для ўсіх беларусаў

Сусветнае прызнанне беларускай пісьменніцы вельмі патрэбнае цяпер нашай краіне.

Лідар грамадзянскай кампаніі «Еўрапейская Беларусь», кандыдат у прэзідэнты на выбарах 2010 года Андрэй Саннікаў павіншаваў Святлану Алексіевіч c атрыманнем Нобелеўскай прэміі ў літаратуры.

«Гэта велізарная радасць. Нават цяжка выказаць словамі, наколькі гэта падзея знакавая для Беларусі і патрэбная нашай краіне ў гэты момант.

Віншую дарагую Святлану з заслужанай высокай узнагародай. Я ўвесь гэты час перажываў і нават забараняў сабе гадаць, якой будзе пастанова Нобелеўскага камітэта. Таму сёння гэта было нечакана, але настолькі прыемна, настолькі радасна, што нават складана выказаць цяпер свае пачуцці.

Святлана Алексіевіч паўплывала на многіх сваёй творчасцю - не прыдворнай і не паркетнай. Яна не баіцца ставіць сур'ёзныя праблемы, раскрываць сэнс з'яў і працэсаў у жыцці, якія, можа быць, не заўсёды прыемна ўсведамляць.

Мы даўно знаёмыя, і Святлана заўсёды мяне ўражвала вострым і глыбокім розумам. То як яна фармулюе - метафарычна, і ў той жа час коратка і ёміста - такі дар дадзены нямногім.

Вельмі ганаруся тым, што Святлана Алексіевіч напісала прадмову да маёй кнігі «Беларуская Амерыканка ці выбары пры дыктатуры».

Сёння, калі мая краіна перажывае не найлепшыя часы, такое сусветнае прызнанне беларускай пісьменніцы дазволіць нам справіцца з гэтымі цяжкасцямі», - заявіў Андрэй Саннікаў сайту charter97.org.