Уладзімір Някляеў: Пастанову пра Плошчу будзем прымаць 10 кастрычніка

Волевыяўленне народа будзе відаць не на ўчастках, а на акцыі ў суботу, 10 кастрычніка.

Экс-кандыдат у прэзідэнты на выбарах 2010 года, вядомы паэт і грамадскі дзеяч Уладзімір Някляеў распавёў у інтэрв'ю charter97.org пра свае планы на нядзелю, 11 кастрычніка.

- Вы ўжо заяўлялі пра тое, што «выбары» 2015 першапачаткова сфальсіфікаваныя ўладай, і грамадзянам варта ісці не на выбарчыя ўчасткі, а на акцыі пратэсту. Якія вашы планы на 11 кастрычніка?

- Апошнім часам многія мне задаюць пытанне аб планах на 11 кастрычніка, маючы на ўвазе, ці будзе арганізаваная Плошча. Хачу сказаць вось што: на Плошчу 2010 выбаршчыкаў заклікалі кандыдаты ў прэзідэнты Рэспублікі Беларусь. Яны заклікалі выйсці не толькі супраць фальсіфікацый, але і каб адстаяць свае галасы, аддадзеныя за дэмакратычных кандыдатаў.

Да гэтага заклікалі амаль усе кандыдаты ў прэзідэнты. І матывацыя як кандыдатаў, так і людзей на Плошчы была цалкам зразумелай. Сёння ўжо відавочна, што ўлада пачала масавыя фальсіфікацыі яшчэ ў пачатку датэрміновага галасавання. Гэта беспрэцэдэнтна: улада проста «пагнала» народ на выбарчыя ўчасткі.

Відавочна, што «кандыдаты», якія ўдзельнічаюць у гэтай палітычнай кампаніі, гэтых «галасоў» не атрымаюць. І менавіта яны павінны былі заклікаць выбаршчыкаў на Плошчу, каб пратэставаць супраць фальсіфікацый. Але ніводнага закліку з боку асоб, якія ўдзельнічаюць у «выбарах» 2015 года, мы не пачулі. Значыць, гэтыя людзі прымаюць гульню, якую ім прапануе ўлада.

Што ў такой сітуацыі рабіць палітыкам, якія пастанавілі не ўдзельнічаць у гэтым «выбарчым балагане»? Па-першае, ацаніць сітуацыю, выявіць пратэстны ўзровень грамадства, што мы і зрабілі, правёўшы некалькі мітынгаў. Цяпер паглядзім, што будзе на Народным сходзе 10 кастрычніка. Гэта будзе ключавым момантам: чаго запатрабуе народ на сходзе 10 кастрычніка на плошчы Свабоды і падчас шэсця да плошчы Якуба Коласа - зыходзячы з гэтага мы і будзем прымаць канчатковую пастанову наконт 11 кастрычніка.

- А як грамадзянін, які мае канстытуцыйнае права ўдзельнічаць ці не ўдзельнічаць у «галасаванні» - што вы маюць намер рабіць?

- Як грамадзянін і палітык, я буду 11 кастрычніка знаходзіцца ў Менску. Безумоўна, ні на якія «выбарчыя» ўчасткі я не пайду. Буду знаходзіцца ў сталіцы і сачыць за сітуацыяй. Ёсць тэндэнцыя да таго, што Плошча можа паўстаць стыхійна - тады дэмакратычным палітыкам трэба быць там, разам з народам.