The Wall Street Journal: Правакацыі Расеі будуць прадаўжацца, пакуль Захад мірыцца з агрэсіяй Пуціна

Паказальны працэс над украінкай Надзеяй Саўчанкай нават паводле мерак пуцінскай Расеі дэманструе цынізм у вышэйшай ступені.

Аб гэтым піша The Wall Street Journal, паведамляе "Украінская праўда".

Выданне адзначае, што выкраданне Надзеі Саўчанкі - не адзіны такі выпадак у гульнях Крамля, і нагадвае пра супрацоўніка эстонскай паліцыі бяспекі Эстана Кохвера. Год таму ён быў выкрадзены на тэрыторыі Эстоніі, у Расеі яго абвінавацілі ў шпіянажы. У верасні 2015 Талін абмяняў яго на "падвойнага" агента, асуджанага ў Эстоніі за перадачу звестак ФСБ Расіі.

"Такія правакацыі будуць прадаўжацца датуль, пакуль Захад будзе дэманстраваць гатоўнасць змірыцца з агрэсіяй Пуціна - ад Латакіі да Луганска", - піша выданне.

Надзея Саўчанка, якая служыла ў Добраахвотніцкім батальёне "Айдар", была захопленая ў палон прарасейскімі сепаратыстамі ў Луганскай вобласці мінулым летам і перапраўленая ў Расею. Яна знаходзіцца ў расейскім СІЗА з лета 2014 года. У снежні ўкраінка абвясціла галадоўку на знак пратэсту супраць затрымання. 5 сакавіка адвакаты Саўчанкі паведамілі, што яна наважыла часткова прыпыніць галадоўку, пасля 82 дзён. 11 сакавіка, адвакат украінкі паведаміў, што самаадчуванне ягонай падабароннай пасля частковай адмовы ад галадання не палепшылася. У сваю чаргу Саўчанка прыстрашыла зноў пачаць галадоўку, калі да яе не пусцяць украінскіх лекараў.

Надзея Саўчанка абраная народным дэпутатам Украіны паводле спісу партыі "Бацькаўшчына". Таксама яна з'яўляецца дэпутатам ПАРЕ.