ЕЗ змякчыў некаторыя санкцыі супраць Расеі

Сярод іншага, знятыя абмежаванні ў дачыненні да паставак РФ кампанентаў ракетнага паліва.

Еўразвяз прыняў пастанову аслабіць санкцыі супраць Расеі ў ракетнай галіне, дазволіўшы абмежаваныя пастаўкі ў Расею такіх кампанентаў ракетнага паліва, як гідразін, гептыл і монаметылгідразін, раней забароненых да экспарту ў РФ. Пра гэта гаворыцца ў матэрыялах афіцыйнага часопіса ЕЗ, паведамляе "Інтэрфакс".

Дазволеныя да паставак у Расею кампаненты выкарыстоўваюцца, напрыклад, пры запусках шмат якіх ракетах-носьбітаў, у тым ліку расейскіх "Пратонаў" і французскіх "Арыянаў".

У часопісе гаворыцца, што ўведзеныя абмежавальныя захады супраць Расеі ў ракетнай і касмічнай галінах не павінны негатыўна адбівацца на рэалізацыі касмічных праграм Еўразвязу або краін, якія ўваходзяць у яго. Таму рада ЕЗ пастанавіла прыняць умову, якая дазваляе пастаўкі кампанентаў ракетнага паліва ў аб'ёмах, патрэбных для запраўкі ракет-носьбітаў і спадарожнікаў, старт якіх ажыццяўляецца ў еўрапейскіх інтарэсах.