Ларан Фабіус: Францыя прадоўжыць барацьбу з тэрарызмам у Сірыі
2- 14.11.2015, 15:14
- 9,326
Неабходна скаардынаваць намаганні ў міжнароднай барацьбе супраць тэрарызму.
Атакі ў Парыжы паказалі, што "цяпер больш неабходна, чым калі-небудзь", скаардынаваць намаганні ў міжнароднай барацьбе супраць тэрарызму, заявіў сёння міністр замежных спраў Францыі Ларан Фабіус у Вене на перамовах, прысвечаных спыненню грамадзянскай вайны ў Сірыі.
Ён адзначыў таксама, што Францыя прадоўжыць свае дзеянні ў барацьбе з тэрарызмам за мяжой. Пра гэта паведамляе gordonua.com са спасылкай на AFP.
Сёння прэзідэнт Францыі Франсуа Аланд абвінаваціў баевікоў "Ісламскай дзяржавы" (ІДІЛ) ва ўчыненні тэрактаў у Парыжы ўвечары 13 лістапада.
27 верасня 2015 года Францыя далучылася да міжнароднай кааліцыі, якая змагаецца з ІДІЛ у Сірыі, і нанесла першы авіяўдар. У кастрычніку авіяўдары прадоўжыліся.
У французскай сталіцы ўвечары 13 лістапада адбылася серыя тэрактаў са стральбой на вуліцах і ў рэстаранах. Таксама прагучала некалькі выбухаў каля стадыёна "Стад дэ Франс", дзе праходзіў футбольны матч паміж нацыянальнымі камандамі Францыі ды Нямеччыны, а ў канцэртнай зале Bataclan, дзе выступаў рок-гурт Eagles of Death Metal, баевікі захапілі закладнікаў.
Паводле апошніх афіцыйных звестак, загінулі 128 чалавек, 250 параненыя. Падчас спецаперацыі французскія сілавікі нейтралізавалі васьмярых нападнікаў.
У сувязі з серыяй нападаў французскія ўлады ўвялі ў краіне надзвычайнае становішча і зачынілі межы.