Прэзідэнт Турцыі: Усе павінны паважліва ставіцца да права Турцыі на абарону сваіх межаў

Прэзідэнт Турцыі Раджэп Эрдаган заявіў, што яго краіна разам з хаўруснікамі неўзабаве створыць «зону бяспекі» ў Сірыі для сірыйскіх туркмэнаў.

Як паведамляе турэцкая тэлерадыёкампанія TRT, на прыёме, дадзеным Эрдаганам у прэзідэнцкім палацы 24 лістапада з нагоды Дня настаўніка, кіраўнік Турцыі закрануў пытанне, якое тычыцца расейскага вайковага самалёта, збітага пасля парушэння ім паветранай прасторы краіны.

Прэзідэнт Турцыі Раджэп Таіп Эрдаган заявіў: «Аб варожым стаўленні Турцыі да якой-небудзь краіны не можа быць і гаворкі. Але ўсе павінны паважліва ставіцца да права Турцыі на абарону сваіх межаў».

«Мы не хацелі б сутыкацца з такімі сітуацыямі, але, на жаль, гэта адбываецца. Турцыя дзейнічала строга ў адпаведнасці з абвешчанымі раней правіламі. Аб варожым стаўленні Турцыі да якой-небудзь суседняй або іншай краіны не можа быць і гаворкі. Да сённяшняга дня больш трагічнай сітуацыі ў Сірыі ўдалося пазбегнуць дзякуючы вытрымцы Турцыі. І хай ні ў каго не ўзнікае сумненняў наконт таго, што мы зрабілі ўсё магчымае для таго, каб прадухіліць і гэты апошні інцыдэнт», - заявіў прэзідэнт Эрдаган.

Турэцкі прэзідэнт, адзначыўшы, што ў туркменскім раёне Байырбуджак няма тэрарыстычнай арганізацыі ІД, сказаў: «Не трэба нікога падманваць. У Байырбуджаку ёсць толькі туркмены, нашы суайчыннікі, нашы сваякі, і на падставе таго, што наносяцца ўдары па ІД, учыняюцца напады на байырбуджакскіх туркменаў».

Прэзідэнт Эрдаган заявіў, што туркмены Байырбуджака спрабуюць абараніць свае землі, яны адпраўляюць свае сям'і ў лагеры, а самі працягваюць супраціў.

«Туркмены Байырбуджака, у сувязі з роднаснымі сувязямі, маюць для нас такое ж вялікае значэнне, што і туркмены Алепа, Хомса, Дамаска і Галан. Мы выдатна ведаем мэты рэжыму Асада і краін, якія яго падтрымліваюць, якія ўчыняюць напады на туркменаў Байырбуджака. Напады на раён, у якім наогул няма тэрарыстаў ІД, наўпрост накіраваныя на падтрымку рэжыму Асада. Турцыя рашуча мае намер вызваліць ад усіх тэрарыстычных арганізацый тэрыторыю ад Джэраблуса да Міжземнага мора. Турцыя заўсёды падтрымлівала і будзе падтрымліваць сваіх братоў, якія пражываюць на гэтай тэрыторыі», - заявіў Эрдаган.

Прэзідэнт Эрдаган, адзначыўшы, што вельмі хутка яны, разам з краінамі-хаўруснікамі рэалізуюць планы для абвяшчэння тэрыторыі ад Джэраблуса да Міжземнага мора зонай бяспекі, заявіў, што гэта дазволіць, з аднаго боку, прадухіліць новыя гуманітарныя трагедыі ў рэгіёне, з другога - даць уцекачам, што хочуць жыць на сваіх землях, такую магчымасць.

«Усе тыя, хто не стане падтрымліваць гэтую ініцыятыву Турцыі ці паспрабуе перашкодзіць гэтаму, возьме на сябе частку адказнасці за кожную новую ахвяру, якая дадасца да 380 тысячам нявінных людзей, якія загінулі ў Сірыі», - сказаў Эрдаган.