Ахмет Давутаглу: Расея адцягвае ўвагу ад парушэння межаў Турцыі

Прэм'ер-міністр Турцыі заклікаў Расею спыніць вінаваціць ягоную краіну ў закупцы нафты ў джыхадысцкай групоўкі і вярнуцца да дыялогу.

Пра гэта Ахмет Давутаглу заявіў у аўторак, 1 снежня, паведамляе Deutsche Welle.

«Нам трэба сесці за стол і абмеркаваць, што рабіць, замест таго, каб вылучаць галаслоўныя абвінавачванні», - сказаў ён.

Давутаглу заявіў, што Расея «не зможа адцягнуць увагу ад парушэнняў турэцкай паветранай прасторы шляхам выстаўлення беспадстаўных абвінавачванняў».

Ён заклікаў Расею адкрыць вайсковыя каналы сувязі для прадухілення такіх інцыдэнтаў у будучыні. «Давайце трымаць дыпламатычныя каналы адкрытымі», - сказаў кіраўнік урада Турцыі.

Турэцкі прэзідэнт Рэджэп Таіп Эрдаган у сваю чаргу заявіў, што ўлада не настолькі ганебная, каб купляць нафту ў тэрарыстаў. «Мы не настолькі ганебныя, каб купляць нафту ў тэрарыстаў. Калі будзе даведзена, што мы гэта рабілі, я пакіну сваё крэсла. Калі ёсць якія-небудзь довады, няхай іх выставяць, паглядзім», - дадаў ён.

Стасункі паміж Масквой і Анкарой пагоршыліся пасля таго, як франтавы бамбавік Су-24 са складу расейскай авіягрупы ў Сірыі 24 лістапада быў збіты турэцкімі знішчальнікамі F-16. Самалёт упаў на поўначы Сірыі каля мяжы з Турцыяй, камандзір экіпажа загінуў, штурман быў выратаваны. Акрамя таго, у выніку абстрэлу сірыйскімі баевікамі верталёта, які выляцеў на пошукі экіпажа бамбавіка, загінуў адзін марскі пяхотнік.

28 лістапада прэзідэнт Расеі падпісаў указ аб увядзенні санкцый у дачыненні да Турцыі.

Пасля інцыдэнту з Су-24 прэс-сакратар расейскага прэзідэнта заявіў, што расейская авіяцыя, якая дзейнічае ў Сірыі, будзе выконваць заданні пад прыкрыццём расейскіх СПА.

Міністр абароны таксама заяўляў, што Расея перакіне на сірыйскую авіябазу найноўшы зенітна-ракетны комплекс С-400, здольны збіваць усе лятальныя апараты, а таксама крылатыя і балістычныя ракеты сярэдняй і малой далёкасці на вышынях да 35 кіламетраў.