На Новы год у Беларусі чакаецца нулявая тэмпература

Папярэдняя тэмпература паветра ўначы на Новы год чакаецца прыблізна 1-6 градусаў марозу, удзень будзе блізу нуля.

Пра гэта паведаміў сёння на брыфінгу "Надвор'е зімы 2015/16" начальнік службы гідраметэаралагічных прагнозаў Рэспубліканскага цэнтра гідраметэаралогіі, кантролю радыеактыўнага забруджвання і маніторынгу навакольнага асяроддзя Мінпрыроды Дзмітрый Рабаў, паведамляе БелТА.

"Да 20 снежня тэмпература паветра ў Беларусі будзе вышэйшай за норму, потым на калядныя святы крыху пахаладае. Праўда, да Новага года тэмпература зноў пачне павышацца. Папярэдняя тэмпература паветра ўначы на Новы год чакаецца 1-6 градусаў марозу, удзень будзе блізу нуля. Месцамі ў краіне прагназуюцца невялікія ападкі - снег і мокры снег", - растлумачыў ён.

Снежань, як адзначае спецыяліст, будзе цяплейшым, чым звычайна. Кажучы пра надвор'е ў першую дэкаду месяца, Дзмітрый Рабаў паведаміў, што ў пятніцу праз тэрыторыю краіны будзе праходзіць атмасферны фронт, таму ў паўночных і цэнтральных раёнах чакаюцца кароткачасовыя ападкі - дождж і мокры снег. На паўночным захадзе прагназуецца вецер з парывамі да 15-20 м/с, туман, на дарогах - галалёдзіца. "У найбліжэйшыя выхадныя надвор'е істотна не зменіцца, нават крыху пацяплее. У суботу і нядзелю ўначы будзе нуль - плюс 5. Удзень чакаецца 2-8 градусаў цяпла. Надвор'е будзе крыху сырым, ветраным і дыскамфортным. Да канца дэкады яно істотна не зменіцца", - распавёў ён.

У другой дэкадзе ў асобныя дні чакаюцца кароткачасовыя ападкі, мокры снег, які будзе пераходзіць у дождж, галалёд, галалёдзіца. Тэмпература ўначы складзе ад нуля да мінус 5, на паўднёвым захадзе - 1-3 градусы цяпла. У трэцяй дэкадзе снежня часам чакаюцца ападкі ў выглядзе снегу і мокрага снегу, на дарогах будзе галалёдзіца. Тэмпература ўначы складзе 2-9 градусаў марозу, пры прасвятленнях - 10-14 градусаў ніжэй за нуль. Удзень - ад мінус 4 да плюс 3, у асобныя дні прагназуецца 5-8 градусаў марозу, але агулам, снежань будзе цёплым.