ЕЗ мае намер прадоўжыць санкцыі супраць РФ яшчэ на паўгода

Адпаведная пастанова можа быць прынятая Радай ЕЗ 14 снежня.

Еўразвяз мае намер прадоўжыць эканамічныя санкцыі супраць Расеі яшчэ на паўгода. Ёсць "агульная згода" ісці ў гэтым кірунку, заявіў міністр замежных спраў Гішпаніі Хасэ Мануэль Гарсія-Маргальё ў Брусэлі ў сераду, 2 снежня. Еўрапейскія дыпламаты пацвердзілі агенцтву dpa ягоныя словы. Цяпер гэты намер павінен быць фармалізаваны. Наступная сустрэча кіраўнікоў МЗС краін ЕЗ запланаваная на 14 снежня, піша Deutsche Welle.

Тэрмін дзеяння эканамічных санкцый у дачыненні да Масквы, упершыню уведзеных Еўразвязам у ліпені 2014 года ў сувязі з канфліктам на ўсходзе Украіны, мінае 31 студзеня. Умовай для іх скасавання названае поўнае выкананне менскіх пагадненняў. Персанальныя санкцыі супраць расейцаў і ўкраінцаў, а таксама супраць некаторых юрыдычных асоб у сувязі з анэксіяй Крыма і падзеямі на Данбасе дзейнічаюць да 15 сакавіка 2016 года.

Абмежавальныя захады ў сувязі з анэксіяй Крыму (распаўсюджваюцца на імпарт крымскіх тавараў у краіны ЕЗ, інвестыцыі ў крымскую нерухомасць, турыстычную дзейнасць у Крыме) мінаюць 23 чэрвеня 2016 года.