Кабякоў: Мы спачатку выдаткоўваем грошы, а потым шукаем збыт
28- 3.12.2015, 18:20
- 18,738
Прэм'ер-міністр Беларусі Андрэй Кабякоў патрабуе ад «Камволя» абгрунтаваць растрату дадатковых сродкаў на заканчэнне «мадэрнізацыі».
Такое даручэнне даў 3 снежня ў Менску прэм'ер-міністр Андрэй Кабякоў падчас наведвання ААТ «Камволь», паведамляе БелаПАН са спасылкай на прэс-службу ўрада.
«Падрыхтуйце мне абгрунтаванне выдаткоўвання дадатковых сродкаў, дзе будзе распісана па пунктах, на што пойдуць гэтыя грошы», - падкрэсліў Кабякоў, калі кіраўніцтва прадпрыемства паведаміла, што для заканчэння інвестыцыйнага праекта патрэбныя дадатковыя сродкі з інавацыйнага фонду Менгарвыканкама.
Са слоў Кабякова, ёсць праблемы ў частцы рэалізацыі гатовай прадукцыі. «Мы спачатку выдаткоўваем грошы, а потым пачынаем вельмі актыўна шукаць спажыўцоў прадукцыі», - заявіў прэм'ер-міністр.
Агулам Кабякоў застаўся незадаволены «мадэрнізацыяй», якая праводзіцца на «Камволі», але канчаткова ў дафінансаванні прадпрыемству не адмовіў. «Ёсць пэўная незадаволенасць ад вынікаў, але перспектыва разгледзець гэтыя пытанні ёсць», - рэзюмаваў Кабякоў.
Мадэрнізацыя ААТ «Камволь» прадаўжаецца на ўказ Лукашэнкі ад 14 лістапада 2013 № 510. Як паведаміла кіраўніцтва прадпрыемства, паводле стану на 20 лістапада 2015 года на папаўненне абарачальных сродкаў былі выдаткаваныя сродкі крэдытнай лініі ААТ «АСБ Беларусбанк» сумай 3,5 млн еўра.