У Паўднёвай Карэі сутыкнуліся 100 аўто (Відэа)

На мосце побач з карэйскім аэрапортам «Інчхон», які знаходзіцца ў 70 кіламетрах ад Сеула, адбылося ДТЗ з удзелам ста аўтамабіляў.

Прычынай сутыкнення стаў моцны туман і абледзяненне трасы. Сярод пацярпелых ёсць грамадзянін РФ. Пра гэта паведамляе паўднёвакарэйскае агенцтва «Рэнхап».

Масавае ДТЗ адбылося раніцай 11 лютага а 09:34 паводле мясцовага часу. Аўтамабілі былі заціснутыя паміж іншымі аўто, перакрыўшымі доступ да параненых. Са слоў аднаго з удзельнікаў аварыі, на якога спасылаецца выданне Independent.ie, перад ударам ён паспеў разгледзець толькі стоп-сігналы, а пасля сутыкнення не змог адкрыць дзверы і выбрацца вонкі, піша motor.ru.

Затор з пабітых аўтамабіляў расцягнуўся на 1,3 кіламетра (даўжыня ўсяго моста, які злучае аэрапорт з трасай, складае 4,4 кіламетра). Рух быў адноўлены да 15 гадзін.

У выніку аварыі загінулі два чалавекі і больш за шэсцьдзесят атрымалі раненні. Акрамя расейца, у масавым сутыкненні пацярпелі грамадзяне Кітая, Тайланда, В'етнама, Філіпін, Японіі, Бангладэша і Швайцарыі. Імаверна, усе яны ехалі ў аэрапорт або ў горад.

У мясцовай паліцэйскай і пажарнай управах растлумачылі, што колькасць загінулых і пацярпелых можа ўзрасці.

Такая масавая аварыя адбылася 10 лютага ў Падмаскоўі. На трасе М-5 «Урал» праз дрэнную бачнасць і галалёдзіцу сутыкнуліся 29 аўтамабіляў.