Нацбанк вяртае пазабіржавы рынак 20 лютага

Банкі змогуць купляць і прадаваць валюту не толькі на біржы, але і ў іншых суб'ектаў валютных аперацый.

Такі пункт змяшчаецца ў пастанове ўправы Нацыянальнага банка, якая апублікаваная на нацыянальным прававым партале, піша tut.by.

Гэта значыць, што з наступнай пятніцы банкі змогуць купляць і прадаваць валюту не толькі на біржы, але і ў іншых суб'ектаў валютных аперацый, а таксама адзін у аднаго.

Нагадаем, праз праблемы на валютным рынку напрыканцы снежня 2014 Нацбанк прыняў пастанову аб закрыцці пазабіржавога рынку. Меркавалася, што забарона на пазабіржавыя ўгоды будзе дзейнічаць да 1 студзеня 2017 года, аднак ужо ў студзені гэтага года Нацбанк заявіў аб магчымым скасаванні абмежаванняў.

З 20 лютага банкі змогуць купляць у суб'ектаў валютных аперацый (экспарцёраў або імпарцёраў) не больш за 20 лотаў (20 тысяч адзінак), устаноўленых на біржавых таргах, адной з замежных валют на дзень па кожным суб'екце.

Банкі змогуць зноў прадаваць валюту суб'ектам валютных аперацый. Але паводле кожнай дамовы (аперацыі) усталяваны ліміт - не больш за 20 лотаў, устаноўленых на біржавых таргах, адной з валют. Акрамя таго, прадавацца могуць "не больш за 20 лотаў, устаноўленых на біржавых таргах на дзень, па кожным суб'екце валютных аперацый".

Акрамя таго, адновяцца ўгоды куплі-продажу замежнай валюты паміж банкамі, паміж банкамі і банкамі-нерэзідэнтамі.