Новы агрэсіўны штам ВІЧ выяўлены на Кубе

Міжнародная каманда навукоўцаў Левенскага каталіцкага ўніверсітэта ў Бельгіі і Інстытута трапічнай медыцыны адкрыла на Кубе новы штам віруса імунадэфіцыту чалавека.

Вірус паводзіць сябе больш агрэсіўна, чым вядомыя дагэтуль формы. Паводле інфармацыі, якую прыводзіць ТАСС, вірус CRF19_cpx «прыкметна паскарае» развіццё СНІДу.

Нягледзячы на тое, што сваім паходжаннем новы штам абавязаны Афрыцы, эпідэмічным ён стаў толькі на Кубе.

Так, навукоўцы даследавалі ўзоры крыві пацыентаў, якія прайшлі лячэнне ў Інстытуце імя П'ера Кюры з 2007 года. Высветлілася, што ў пацыентаў са штамам CRF19_cpx у крыві знаходзілася вялікая колькасць віруса. Нечакана хуткая эвалюцыя СНІДу значна павялічвае рызыку захворвання яшчэ да таго, як патэнцыйныя хворыя ўсведамляюць гэта, гаворыцца ў заключэнні даследавання.

Паведамляецца, што такое даследаванне праводзілася ў сувязі з тым, што кубінскія спецыялісты былі сур'ёзна занепакоеныя праз значнае распаўсюджванне выпадкаў захворвання, якія «выяўляліся раптоўна». У дакладзе адзначана, што, як правіла, звычайна ў носьбітаў ВІЧ-інфекцыі хвароба развіваецца ад 6 да 10 гадоў, у той час як у 16% дыягнаставаных на Кубе хворых СНІД выяўляўся ўжо на стадыі дыягностыкі.

На Кубе, паводле звестак сумеснай праграмы ААН па ВІЧ/СНІДу, з 1986 да 2013 г. выяўлена блізу 20 тыс. выпадкаў хваробы, з якіх 3,3 тыс. скончыліся смяротным зыходам.