Кіраўнік МЗС Польшчы: Пытанне паставак зброі ва Украіну не закрытае
1- 14.02.2015, 17:47
- 5,545
Па-ранейшаму няма упэўненасці, што ў нядзелю ў Данбасе надыдзе мір.
Міністр замежных спраў Польшчы Гжэгаж Схетына мяркуе, што пытанне паставак зброі ва Украіну пакуль не закрытае, бо на ягоную думку, няма упэўненасці, што ў нядзелю ў Данбасе надыдзе мір. Пра гэта ён сказаў у суботу ў эфіры польскага тэлеканала TVP Info, паведамляе УНП.
"Гэта было вельмі магутна сказана прэзідэнтам ЗША Баракам Абамам - тэма паставак зброі ва Украіну вернецца, калі канфлікт не скончыцца так, як бы мы гэтага хацелі, так, як гэта пастанавілі ў Менску", - сказаў Схетына.
"Ці маем мы ўпэўненасць, што мір у нядзелю раніцай прыйдзе на Данбас? Няма такой упэўненасці", - растлумачыў міністр замежных спраў Польшчы.
Раней у чацвер Схетына, знаходзячыся з візітам у Будапэшце, заявіў, што падпісанае ў выніку перамоў у сталіцы Беларусі пагадненне, якое прадугледжвае спыненне агню ў Данбасе, закрывае пытанне магчымых паставак зброі ва Украіну.
"Тэмы паставак зброі цяпер не існуе, бо праз два дні ва Украіне будзе замірэнне", - заяўляў Схетына ў сталіцы Вугоршчыны.