Украінская выведка: Баевікі пад Марыупалем рыхтуюць маштабную правакацыю

Баевікі рыхтуюцца да абстрэлу расейскай тэрыторыі пад выглядам украінскіх вайскоўцаў з тым, каб РФ увяла дадатковыя войскі пад Новаазоўск.

Выведка сектара "М" паведамляе, што баевікі пад Марыупалем хочуць абстраляць расейскую тэрыторыю. Пра гэта паведаміў прэс-афіцэр сектара "М" АТА Дмытро Чалы.

Як перадае карэспандэнт ЛІГАБізнэсІнформ, гэты тэракт, паводле звестак выведкі сектара "М", спланаваны з мэтай справакаваць РФ для ўводу сваіх войскаў на тэрыторыю Украіны з боку Новоазоўска.

Са слоў Чалага, баевікі маюць намер "адвесці ўсю сваю тэхніку на тэрыторыю населенага пункта Безыменнае, і пад украінскімі сцягамі адкрыць агонь па тэрыторыі Расеі, тым самым справакаваўшы ўвод войскаў суседняй дзяржавы".

Правакацыі такога характару ўжо фіксаваліся выведкай сёння. Так, тэрарысты, прымацаваўшы ўкраінскі сцяг да адной з машын РСЗА БМ-21 "Град", вялі агонь па населеным пункце і здымалі гэта на відэа. "Цяпер сілы АТА распрацоўваюць контрзахады, каб сарваць гэтыя планы супраціўніка", - падкрэсліў Чалы.

Нагадаем, сёння ў раёне населенага пункта Шырокіна пад Марыупалем увесь дзень ідзе жорсткі бой. Вораг выкарыстоўвае ўстаноўкі БМ-21 "Град", мінамёты, цяжкую артылерыю. Сілы АТА падбілі 2 танкі, адзін БТР, адзін БМП і знішчылі вялікую колькасць жывой сілы баевікоў.

Паводле апошніх звестак, страты ўкраінскіх вайскоўцаў склалі: два загінулыя, 14 параненых.