МЗС Нямеччыны: Адпраўка міратворцаў ва Украіну магчымая пры стабільным замірэнні
39- 20.02.2015, 10:22
- 16,950
Перадумовай для адпраўкі ва Украіну міратворчай місіі павінна быць стабільнае замірэнне.
Пра гэта заявіў міністр замежных спраў Нямеччыны Франк-Вальтэр Штайнмаер, паведамляе Deutsche Welle.
"Калі Пятро Парашэнка афіцыйна гэта прапануе, гэтая прапанова, вядома, заслугоўвае грунтоўнага разгляду", - адзначыў кіраўнік замежнапалітычнай установы ФРГ у чацвер, 19 лютага, падчас знаходжання ў Конга, паведамляе інфармацыйнае агенцтва dpa.
Пры гэтым Штайнмаер дадаў, што такая міратворчая місія мае сэнс толькі ў тым выпадку, калі яе падтрымліваюць усе бакі канфлікту.
Ён таксама заявіў, што гэтая ідэя абмяркоўвалася падчас сустрэчы лідараў краін "нармандскага фармату" у Менску, аднак не была прапісаная ў дакументах паводле вынікаў сустрэчы.
Таксама патрэбная згода бакоў канфлікту што да ўдзелу тых ці іншых краін у такой місіі, адзначыў палітык. "Усё гэта патрабуе крыху часу", - заявіў ён.
Да таго ж трэба высветліць, якім чынам можна палепшыць "верыфікацыйныя магчымасці" Арганізацыі бяспекі і супрацоўніцтва ў Еўропе (АБСЕ), адзначыў Штайнмаер.