СК расследуе забойства крымінальнага аўтарытэта з Кыргызстана ў Менску
2- 20.02.2015, 15:53
- 21,480
Следства правярае ўсе магчымыя версіі забойства мужчыны, знойдзенага на вуліцы Карла Лібкнехта ў Менску.
Труп мужчыны быў знойдзены ў багажніку аўтамабіля прадстаўніцкага класа на вул. Карла Лібкнехта 18 лютага з колата-рэзанымі раненнямі цела, паведамляе прэс-служба Следчага камітэта.
Следствам правяраюцца розныя версіі таго, што здарылася. У тым ліку і тая, якая была агучаная шэрагам сродкаў масавай інфармацыі аб прыналежнасці забітага да злачыннай супольнасці.
Праца ў высвятленні абставінаў забойства і ідэнтыфікацыі асобы загінулага працягваецца. Прызначаная судова-медыцынская, генатыпаскапічная і шэраг іншых экспэртыз.
Праведзены шэраг аглядаў, у тым ліку аўтамабіля і меркаванага месца пражывання забітага. Следчыя працуюць са сведкамі паводле крымінальнай справы.
У рамках кожнай з адпрацаваных следствам версій плануецца правядзенне працэдур апазнання трупа.
З мэтай атрымання інфармацыі праваахоўныя органы Беларусі кантактуюць з праваахоўнымі органамі іншых дзяржаў. Следствам рыхтуюцца адпаведныя просьбы аб наданні прававой дапамогі. Расследаванне даручанае следчай групе Галоўнай следчай управы.
Паводле некаторых звестках, у Менску быў забіты крымінальны аўтарытэт з Кыргызстана Алмамбет Анапіяеў.
Што тычыцца асобы Алмамбета Анапіяева, то на радзіме яго называюць правай рукой злодзея ў законе з мянушкай Коля Кіргіз, ён жа Камчыбек Кальбаеў. Анапіяеў кантраляваў паўднёвыя рэгіёны Кыргызстана і нават сябраваў з Жанышам Бакіевым, братам былога прэзідэнта Кыргызстана Курманбека Бакіева, які з сям'ёй хаваецца ў Беларусі.