Лукашэнка: Мама Колі бачыць яго не часцей, чым вы праз тэлевізар

Дыктатар распавёў пра сваю сям'ю і пра тое, што не збіраецца аддаваць уладу.

Пра гэта Лукашэнка заявіў у інтэрв'ю прафесару Рэдфардскага ўніверсітэта Рыгору Ёфе. Фрагменты інтэрв'ю ў перакладзе з ангельскай апублікавала «Радыё Свабода».

У інтэрв'ю дыктатар заявіў, што не збіраецца сыходзіць.

«Я мяркую, яна (палітычная дзейнасць) можа скончыцца зусім нечакана, калі я адчую, што людзі мяне не чуюць і не разумеюць, і я ім надакучыў - гэта галоўнае, таму што мяне не абвінаваціш, што я дрэнна працую, што я скраў, што я ўкраду (гэта выключана, гэта людзі разумеюць), але калі я адчую, што яны ўжо хочуць кагосьці іншага, і такія ж людзі ёсць, я гэта разумею - нечаканасць будзе ў тым, што я імгненна пайду. Імгненна, нават не задумваючыся і не раздумваючы. Але я б не хацеў, каб было так. Не хацеў бы. У той жа час я разумею, што я ж не вечны. І галоўны тут мой вораг - гэта здароўе. Я не кажу, што я нездаровы цяпер, але я ж не жалезабетонны. Хоць і жалезабетон руйнуецца. Усё можа быць. Пакуль я сябе нармальна адчуваю... На здароўе пакуль не скарджуся, дзякуй Богу. Але калі будзе не па сілах і здароўе будзе дрэннае, ну які ж я прэзідэнт! Ніякіх іншых відавочных прычын, каб я думаў, што пара сыходзіць, сёння няма», - заявіў Лукашэнка.

Пры гэтым запаснога аэрадрома, куды можна было б спакойна сысці, у Лукашэнкі, з ягоных слоў , няма.

«Я пра гэта думаю. Шчыра кажу, я думаю пра гэта. Але не моцна напружваюся. Чаму? Таму што я ўсё ж спадзяюся, што адмарозкі гэтыя, здраднікі, яны не прыйдуць да ўлады. Ну, прыйдзе там Радзькоў, я не думаю, што нават калі ён будзе мець іншую пазіцыю, ён пойдзе ў атаку на мяне і не дасць мне нейкі дом, дзе я змагу спакойна жыць. І потым, калі я яшчэ буду здаровы, я зараблю грошы. Грошы я зараблю. У мяне дзеці, добрыя дзеці. Малы гэты - я абавязаны падняць яго на ногі, таму абавязаны зарабіць гэтыя грошы. Таму я не моцна напружваюся. У мяне вельмі шмат сяброў, якія мне дапамогуць», - адзначыў ён.

Дыктатар таксама распавёў пра сваю сям'ю.

«Я неразведзены чалавек, а ў мяне ад іншай жанчыны нарадзіўся сын. Я не адпавядаю класічнаму разуменню вялікага сем'яніна: каханне на ўсё жыццё, ні адной іншай жанчыны не было - ідэальны чалавек. Вось гэта сем'янін, кажуць. Ну а я не такі. Я маю на ўвазе, што ну не ідэальны я чалавек. Але я не подлы чалавек. Я ніколі нікога не крыўдзіў і ніколі не кідаў. Я заўсёды імкнуся дапамагчы.

І вось усе дзівяцца, чаму жонка так паводзіцца ў дачыненні да мяне. Яна разумны чалавек. Ну што, паводзілася б яна па-іншаму, пачала б пісаць у газетах, патрабаваць ад мяне штосьці - што б гэта змяніла? Проста людзі б пасмяяліся, рукі б пацерлі і гэтак далей. Ну а яна не такі чалавек, яна нармальны чалавек. Мы прызналіся так, як мы ўважаем патрэбным. Яе дзеці - мае дзеці - гэта самыя родныя людзі для мяне», - сказаў ён.

Паводле слоў Лукашэнкі, маці Мікалая «бачыць свайго сына не часцей, можа быць, чым іншыя праз тэлевізар». «Гэта мой сын, які вырас у мяне на руках, я нават не хачу казаць, чаго мне гэта каштавала - калі не буду прэзідэнтам, раскажу. Ён ніколі не клаўся без мяне спаць і ніколі не прачынаўся», - заявіў Лукашэнка.