Бабруйскі завод трактарных дэталяў пераведзены на чатырохдзёнку

На Бабруйскім заводзе трактарных дэталяў і агрэгатаў зафіксаваныя праблемы з выплатай заробку і загружанасцю прадпрыемства.

Аб сітуацыі на Бабруйскім заводзе трактарных дэталяў і агрэгатаў praca-by.info распавёў лідар мясцовай пяршоўкі Свабоднага прафзвязу Беларускага (СПБ) Міхаіл Кавалькоў.

«Аб'ёмы вытворчасці на прадпрыемстве падаюць. У 2014 годзе перыядычна здараліся прастоі па пятніцах, то бок завод пераходзіў на чатырохдзёнку. Праблемы перавандравалі і ў гэты год. Да 12 студзеня на прадпрыемстве наогул былі вакацыі. Затым працавалі стабільна, але ў мінулую пятніцу на працу выйшла толькі першая змена. Другая і трэцяя прастойвалі, ім выплацяць па 2/3 тарыфнай стаўкі. Акрамя таго, прастойваў завод і ў суботу, на якую быў перанесены працоўны дзень са студзеня», - паведаміў Кавалькоў.

Важна адзначыць, што ўпершыню за многія гады снежаньскі заробак быў выплачаны рабочым з затрымкай. Гэта з'яўляецца парушэннем калектыўнай дамовы і Дэкрэта №5, дзе зацверджаная адказнасць наймальніка за не ў час выплачаны заробак.

«У нас тут смяюцца: не паспеў увайсці ў дзеянне Дэкрэт №5, як дырэктар завода яго парушыў», - адзначыў лідар прафзвязу.

У СПБ працягваюць сачыць за лёсам працоўных Аляксандра Варанкіна, Мікалая Жыбулі, Аляксандра Грамыкі і Алега Шаўчэнкі, якія былі звольненыя з Бабруйскага завода трактарных дэталяў і агрэгатаў за сяброўства ў Свабодным прафзвязе і ў лістападзе мінулага года правялі галадоўку з патрабаваннем аднавіць іх на працы.

«На жаль, за выключэннем Варанкіна, яны працу да гэтага часу не знайшлі. Але гэта было прадказальна. У папярэднія гады пры працаўладкаванні нашых чальцоў на іншыя прадпрыемствы ў іх цікавіліся, да якога прафзвязу яны належаць, і калі даведваліся, што да вольнага, адмаўлялі ў прыняцці на працу. А тут яшчэ больш няпросты выпадак. Як сказала суддзя, якая аштрафавала галадоўнікаў, іх акцыя мела шырокі грамадскі рэзананс. Таму, напэўна, не трэба здзіўляцца, што вакансіі на прадпрыемствах ёсць, але нашых чальцоў на працу не бяруць», - сказаў Міхаіл Кавалькоў.