Шайгу дапусціў імавернасць узброенай барацьбы за Арктыку

Міністр РФ Сяргей Шайгу заявіў аб магчымасці абароны дзяржаўных інтарэсаў у Арктыцы сродкамі ўзброенай барацьбы.

Пра гэта гаворыцца ў паведамленні ўправы прэс-службы ды інфармацыі міністэрства, якое атрымала рэдакцыяй Lenta.ru.

«Сталая вайсковая прысутнасць у Арктыцы і магчымасць абароны дзяржаўных інтарэсаў сродкамі ўзброенай барацьбы разглядаецца як складовая частка агульнай палітыкі забеспячэння нацыянальнай бяспекі», - сказаў Шайгу.

Са слоў кіраўніка Мінабароны Расеі, Арктыка цяпер ператвараецца ў адзін з вядучых цэнтраў здабычы карысных выкапняў і магутны вузел транспартных камунікацый. Асвойваць рэгіён імкнуцца не толькі пяць арктычных дзяржаў - Расея, Нарвэгія, Канада, Данія і ЗША, - але і краіны, якія не маюць наўпроставага выхаду да прыпалярных тэрыторый. Сярод іншых, на дзель рэсурсаў Арктыкі прэтэндуе Кітай.

«Такім чынам, цяпер у Арктыцы фармуецца шырокі спектр патэнцыйных выклікаў і пагроз бяспекі нашай краіне, - адзначыў Шайгу. - У сувязі з гэтым адным з прыярытэтных кірункаў дзейнасці міністэрства абароны з'яўляецца развіццё ў гэтай зоне вайсковай інфраструктуры».

У снежні 2014 для каардынацыі вайсковага будаўніцтва і дзеянняў падраздзяленняў Мінабароны ў Арктыцы было сфармавана міжтыпавае аб'яднанае стратэгічнае камандаванне Паўночнага флота «Поўнач». Пад яго кіраўніцтвам да канца сакавіка 2015 будзе створаная першая з двух арктычных брыгад, якая размесціцца ў вайсковым гарадку Алакурці Мурманскай вобласці. Цяпер там дабудоўваецца вайсковая і сацыяльная інфраструктура.

Вайсковыя мястэчкі замкнёнага цыклу будуюцца таксама на архіпелагу Новасібірскія выспы, Новая Зямля, Зямля Франца-Іосіфа. Акрамя гэтага аднаўляецца аэрадромная сетка, фармуецца адзіная сістэма СПА і кантролю за становішчам у арктычнай зоне. Шэраг падраздзяленняў Узброеных сіл Расеі ўжо прыступіў да выканання баявога дзяжурства ў рэгіёне на сталай аснове.