Літва рыхтуе адказ на расейскую прапаганду

Літоўская нацыянальная вяшчальная тэлерадыёкампанія LRT мерыцца выдаваць новыя праграмы для расейскамоўнага насельніцтва.

Пра гэта паведамляе выданне ru.DELFI.lt.

Паведамляецца таксама, што ўвосень плануецца запусціць праграму, якая будзе выкрываць крыніцы прапаганды і прынцыпы іх дзеянні.

Гэта пытанне абмяркоўвалася на супольным пасяджэнні прадстаўнікоў Рады LRT, Рады культуры і мастацтва і Міністэрства культуры Літвы.

Са слоў старшыні Рады LRT Жыгінтаса Пячуліса, цяпер завяршаецца выпрацоўка ўмоў для праграм, якія плануецца запусціць з восені.

Хоць фармат праграм і іншыя дэталі, паводле ягоных слоў, на пасяджэнні не абмяркоўваліся, гаворка, тым не менш, ішла аб тым, што ў праграме можна было б паказваць з камэнтарамі ўрыўкі канкрэтных прапагандысцкіх праграм.

LRT таксама мае намер павялічыць прапанову створаных на Захадзе праграм для расейскамоўнага насельніцтва - тэлевізія днямі закончыла ўзгадненне ўмоў супрацоўніцтва з дзяржаўнай вяшчальнай кампаніяй Нямеччыны Deutsche Welle аб рэтрансляцыі інфармацыйных праграм на расейскай мове.

З сярэдзіны мінулага года каналы LRT і LRT Kultura паказваюць праграмы на расейскай мове, створаныя ўкраінскім "5-м каналам" і радыё "Свабодная Еўропа" у Чэхіі.

Сойм Літвы на веснавой сесіі працягне разгляд унесеных прэзідэнтам паправак аб барацьбе з прапагандай, якія, сярод іншага, прапануюць за распальванне вайны і нянавісці караць рэтранслятараў.

Раней паведамлялася, што спецслужбы Літвы назіраюць усё больш відавочныя намаганні Расеі для распальвання інфармацыйнай вайны і распаўсюджвання прапаганды ў СМІ і сацыяльных сетках краіны.