Жэлька Бабіч стане трэнерам нацыянальнай каманды Харватыі

Настаўнік Берасцейскага гандбольнага клуба імя Мяшкова Жэлька Бабіч прызначаны галоўным трэнерам нацыянальнай каманды Харватыі.

Такую пастанову прыняло напярэдадні кіраўніцтва Харвацкага гандбольнага саюза, паведамляе БелТА.

Жэлька Бабіч зменіць свайго калегу Слаўка Галужу, пад кіраўніцтвам якога нацыянальная каманда Харватыі на нядаўнім чэмпіянаце свету ў Катары не змагла здабыць узнагарод, саступіўшы ў чвэрцьфінале палякам. Дэбют новага рулявога харвацкіх гандбалістаў адбудзецца 29 красавіка ў Ставангеры, калі ягоныя новыя падапечныя правядуць чарговы адборачны матч чэмпіянату Еўропы-2015 супраць нацыянальнай каманды Нарвегіі.

Цяпер Жэлька Бабіч рыхтуе гандбалістаў БГК да хатняга паядынку SEHA-лігі супраць македонскага "Металурга" са Скоп'я (1 сакавіка; берасцейскі спарткомплекс "Вікторыя", пачатак а 17.00). У гэтым сезоне берасцейцы ўжо двойчы сустракаліся з "Металургам" у групавым турніры Лігі чэмпіёнаў - у Берасці чэмпіёны Беларусі перамаглі гасцей з македонскай сталіцы з лікам 28:24, а ў Скоп'і спаборнікі разышліся ўнічыю - 27:27.

Берасцейская дружына вядзе барацьбу за траплянне ў квартэт наймацнейшых SEHA-лігі, які ў канцы сакавіка разыграе галоўны прыз гэтых спаборніцтваў. Туды таксама імкнуцца трапіць яшчэ тры каманды: македонскі "Вардар" са Скоп'я, харвацкі "Заграб" і славацкі "Татран" з Прэшава. Адзін тур у "Фінал чатырох" ужо забраняваў вугорскі "Веспрэм", якога ўжо ніхто не зможа пацясніць з першага месца.

Цяпер становішча фаварытаў SEHA-лігі такое: "Веспрэм" - 48 балаў (16 матчаў), "Вардар" - 39 (16), "Заграб" - 30 (15), "Татран" - 30 (15), БГК - 27 ( 14). За перамогу ў матчах на гэтым турніры каманда атрымлівае 3 балы, за нічыю - 1, за паражэнне - 0.

Першы этап турніру скончыцца 18 сакавіка. У мінулым сезоне БГК у вызначальным паядынку "Фіналу чатырох" саступіў "Вардару" з лікам 27:29, заняўшы другое месца.