Аляксандра Францкевіча прысудзілі да 25 дзён арышту
10- 3.02.2015, 15:14
- 9,987
Былога палітвязня абвінавацілі ў парушэнні адразу двух артыкулаў адміністрацыйнага кодэксу.
У судзе Савецкага раёна Менска 3 лютага адбыўся разгляд справы аб адміністрацыйным правапарушэнні ў дачыненні да Аляксандра Францкевіча. Суддзя - Арцём Бескішскі, піша ПЦ «Вясна».
Затрыманага 2 лютага Францкевіча абвінавацілі ў парушэнні адразу 2 артыкулаў: арт.17.1 КаАП (дробнае хуліганства) і 23.4 (непадпарадкаванне законным патрабаванням службовай асобы).
З паказанняў Францкевіча стала вядома, што падчас працоўнага дня некалькі чалавек прыйшлі да яго на працу. Дырэктар папрасіў спусціцца яго ўніз, дзе супрацоўнікі ў цывільным ужо чакалі яго. Пасля гэтага актывіста даставілі ў РУУС Савецкага раёна, дзе былі складзеныя два пратаколы.
У судзе выступілі два сведкі - супрацоўнікі АМАП Сіняк і Палавінкін. Абодва паказалі, што грамадзянін Францкевіч на праспекце Незалежнасці, 58 паводзіў сябе падазрона: хадзіў узад-наперад, тузаўся, нерваваўся, чым і прыцягнуў да сябе ўвагу. Абодва сведкі распавялі, што яны нібыта прадставіліся, паказалі пасведчанне, пасля чаго Францкевіч пачаў уцякаць. Калі яго дагналі, яму яшчэ раз паказалі пасведчанне, ён у сваю чаргу пачаў лаяцца грубай нецэнзурнай лаянкай, пагражаць непрыемнасцямі на працы. Пасля гэтага быў папярэджаны аб прымяненні фізічнай сілы, пасаджаны ў службовую машыну і дастаўлены для разбору ў РУУС Савецкага раёна. Ноч да суда Аляксандр Францкевіч правёў у ізалятары на Акрэсціна.