Амбасадар ЗША ў NATO: Войска Расеі ваюе ва Украіне з красавіка 2014
22- 5.02.2015, 8:13
- 32,079
Летась у жніўні Расея ўчыніла беспасярэднюю інтэрвенцыю.
Пра гэта паведаміў амбасадар ЗША ў NATO Дуглас Лют, паведамляе "Радыё Свабода".
Расейскія вайсковыя спецыялісты выконваюць у канфлікце камандную і кантрольную ролю, а таксама працуюць там на складанай вайсковай тэхніцы, з якой няздольныя справіцца сепаратысты, у прыватнасці адзначыў ён перад пачаткам пасяджэння міністраў абароны краін NATO ў Брусэлі.
Узброеныя сілы Расеі прадстаўленыя на тэрыторыі Украіны і баявымі войскамі, і аператыўнымі работнікамі выведкі. Некаторыя з іх дзейнічаюць у вайсковай форме расейскіх войскаў, іншыя абыходзяцца без гэтага, паведаміў Лют.
Таксама амбасадар ЗША ў NATO адзначыў, што летась ў жніўні Расея ажыццявіла беспасярэднюю вайсковую інтэрвенцыю - тады ва Украіну ўводзілі цэлыя расейскія батальёны ў поўным складзе.
Пры гэтым у ЗША цяпер не ўважаюць непазбежнай новую беспасярэднюю вайсковую інтэрвенцыю Расеі такога маштабу, заявіў Лют.