За два тыдні грэчка і бананы падаражэлі на 30%

Прадаўцы выстаўляюць тавар новымі коштамі.

Да Новага года Міністэрства гандлю забараняе падымаць кошты на ўсе пад пагрозай закрыцця крамаў. Мараторый спачатку дзейнічае да 15 студзеня, а затым аб'яўляецца бестэрміновым. Аднак 3 лютага Мінгандлю разам з Міністэрствам эканомікі выдалі пастанову і патлумачылі, як імпарцёры могуць павышаць кошты, паведамляе «Еўрарадыё».

Простыя пакупнікі без папярэджання пачалі закупляцца грэчкай, алеем, рысам і цукрам. Прычым адбылося гэта, як толькі пачаў падаць беларускі рубель.

«Пачкамі бралі цукар, куплялі па 20 пакетаў грэчку, рыс, алей таксама. А цяпер ніхто і не бярэ», - кажа прадаўшчыца Таццяна з Еўраопта, што на вуліцы Несцерава. Паліцы сапраўды пустыя!

Грэчкі і рысу засталося лічаныя пакеты. Гэтыя крупы падаражэлі: да прыкладу, пакет 700-800 грамаў каштаваў 9950 - 12000 рублёў (на 25 снежня 2014), а на 2 лютага кошты выраслі на 30% - да 13-15 тысяч рублёў за тыя ж 700 грамаў грэчкі. Алей «Залатая семка» менш чым за тыдзень таксама вырас ў кошце з 15500 да 18900 за літр (падаражанне склала 22%).

Вырасла ў кошце таксама мука беларускай вытворчасці. 2 кілаграмы «Лідскай мукі» вышэйшага гатунку прывезлі коштам 19900 рублёў. Гэта на 25% даражэй, чым 25 студзеня.

Ва ўнівермагу «Цэнтральны» прадаўцоў, якія перапісвалі цэннікі, не відаць, але тут кошты ўжо выраслі: набор падаражэлых прадуктаў той самы - грэчка, алей, рыс. Больш за ўсё тут падаражэў алей - да 20-23 тысяч за 900 грамаў!

Моцна падаражэлі садавіна і гародніна: да прыкладу, калі бананы каштавалі тут у сярэдзіне студзеня 15-16 тысяч рублёў, то цяпер - 25 000 рублёў. У іншых крамах на пытанне, што ў іх падаражэла, першае, што называюць, - бананы.

Іх кошт вагаецца: за кіло просяць 20-25 тысяч рублёў. Калі за 2014 бананы, паводле афіцыйнай статыстыкі, падаражэлі толькі на 0,2%, то за першы месяц 2015 яны выраслі ў кошце на 28%!

Самыя танныя польскія яблыкі каштуюць блізу 13 000 рублёў, перац - 83 000 рублёў. Пакупнікі і карыстальнікі сацсетак пішуць, што выраслі ў кошце таксама прэзерватывы, гарбата, кава, піва.

Загадчыца магазіна «Суседзі» Святлана, што на вуліцы Прытыцкага ў Менску, кажа, што падаражанне ўжо адбылося.

«Прыкладна на 20-30% па некаторых пазіцыях падаражэлі прадукты. Гэта збольшага прывазныя, імпартныя прадукты. Беларускае засталося старымі коштамі. А вось піва сёння як раз прыедзе - будзе новымі. Але не скажу, якімі, бо яшчэ не бачыла накладныя», - дадае Святлана.

У кампаніі «Фруктэст», якая пастаўляе ў Беларусь агуркі, памідоры, бананы, заўважаюць, што падаражанне ў 30% ужо адбылося.

«Тыдзень таму кошты выраслі ў нас прыкладна на 30%. Устанавілася, як мы бачым, добрая здаровая канкурэнцыя. І нават таннее дзесьці садавіна, бо ні ў каго няма зацікаўленасці прывозіць дарагія. Паліцы напаўняюцца паступова. Цяпер мы зацікаўленыя закупляць добрую садавіну і добрымі коштамі, так як мы разумеем, што людзі збяднелі», - кажуць у кампаніі. Тут заўважаюць, што далейшага павышэння коштаў, калі не здарыцца штосьці, чакаць не варта. Даражэць прадукты будуць, але не рэзка, а паступова.