Праз гомельскую мытню спрабавалі правезці біўні маманта

3 лютага ў пункт пропуску «Новая Гута» прыбыў аўтобус маркі Neoplan, што ехаў з Украіны ў Літву па маршруце Кіеў - Вільня.

У багажным аддзяленні сярод асабістых рэчаў пасажыраў мытнікі выявілі часткі, як мяркуецца, біўня маманта.

Пра гэта charter97.org паведамілі ў прэс-групе Гомельскай мытні.

Падчас апытання было ўстаноўлена, што гэты тавар перамяшчае адзін з кіроўцаў аўтобуса, каб аддаць у Вільні незнаёмым асобам. За перасоўванне тавару ён атрымаў грашовую ўзнагароду сумаю $50.

Як мяркуецца, гэтыя прадметы належаць да культурных каштоўнасцяў і падлягаюць абавязковаму пісьмоваму дэклараванню ў адпаведнасці з арт. 8 Пагаднення аб парадку перамяшчэння фізічнымі асобамі тавараў для асабістага карыстання праз мытную мяжу Мытнага саюза і правядзенне дзеянняў, звязаных з іх выпускам. Тавар арыентыровачным коштам Br6,6 млн канфіскаваны. Прызначаная біялагічная экспертыза. Паводле гэтага факту Гомельская мытня пачала адміністрацыйны працэс.