«Мінскі дом вокнаў» не плаціць заробкі са жніўня

Прадпрыемства спасылаецца на вялікія запазычанасці, прынамсі - за вокны Нацыянальнага аэрапорта «Мінск».

Пра гэта charter97.org паведаміў чытач Уладзімір Папоў, былы супрацоўнік прадпрыемства ТАА «Мінскі дом вокнаў», які быў адным з сотняў чалавек, якія звольніліся пасля жніўня з прычыны нявыплаты заробкаў. Прадпрыемства спасылаецца на тое, што ў іх вельмі шмат вінаватых, прынамсі, дагэтуль «вісіць» неаплачаная вялікая замова вокнаў для Нацыянальнага аэрапорта «Мінск», які, як вядома, рамантавалі да ЧС у хакеі.

- З жніўня 2014 года пачаліся затрымкі выплаты заробкаў. Месяц, другі, трэці - нам выплачваўся толькі адзін мільён беларускіх рублёў. У сувязі з гэтым пачаліся звальненні. Былі размовы, кіраўніцтва збірала людзей на сходы, у нас у сваю чаргу былі невялікія страйкі - паўдня-дзень. Усё скончылася тым, што блізу 300-400 чалавек звольнілася. Нікога з іх пры звальненні не разлічылі. Частка з іх знайшла іншую працу, плюнула і працуе, а частка - гэта мы, прыкладна 150-200 чалавек - падалі заяву ў суд і атрымалі станоўчую пастанову суда аб выплаце заробку. Усе дакументы былі накіраваныя судоваму выканаўцу і на прадпрыемства. Цяпер, вось ужо цягам паўгода, нічога дагэтуль не змянілася. Мы спрабуем пісаць нейкія звароты, на наступным тыдні плануем напісаць ліст у Адміністрацыю Лукашэнкі, адпраўляць ліст у выканкам, пакуль сабралі толькі 50 подпісаў, - распавёў ён.

- Але з чыёй віне справа не развіваецца? Вам неяк дапамагае судовы выканаўца?

- Цягам паўгода наш судовы выканаўца марудзіць і распавядае нам байкі. Маўляў, прадпрыемства само падало на яго ў суд, нібыта аспрэчылі ягоную пастанову. Гэта ўсё з ягоных слоў. Ніякай афіцыйнай інфармацыі і пацверджанняў ён нам не дае. Ён сказаў, што прыйшоў на прадпрыемства, апісаў маёмасць і даў ім дзесяцідзённы тэрмін для выплаты запазычанасці ў заробку судовай пастановай. На дзевяты дзень прадстаўнікі «Дома вокнаў» прыйшлі да яго з адвакатам і падалі канстытуцыйную скаргу з нагоды ягонай пастановы аб вопісе маёмасці і з просьбай падоўжыць тэрмін. У выніку справа прыпыненая да судовага разбору. Цягам якога часу справа будзе «прыпыненая», якія тэрміны? Ён у адказ: я нічога не ведаю, зрабіць нічога не магу і наогул, груба кажучы, перастаньце мне тэлефанаваць. Працоўны тэлефон яго не спрацоўвае - чуваць пстрыканне, пасля якога ўжо не чуваць гудка - а мабільны тэлефон ён не дае. А наогул, сістэма ў іх такая: калі ёсць нейкія прэтэнзіі да судовага выканаўцы, то ты павінен напісаць заяву на імя старэйшага судовага выканаўцы. Але ў гэтым выпадку наш і з'яўляецца старэйшым.

- Гэта значыць, заробак вам не выдалі дагэтуль. Што на гэта кажа прадпрыемства?

- Раней яны казалі: падавайце ў суд, рабіце, што хочаце - грошай вы ўсё роўна не ўбачыце. А матывуюць яны адмову тым, што грошай у іх няма, бо быццам бы ім дагэтуль вінны аэрапорт Мінск-2. Была вялікая замова вырабу вокнаў для менскага аэрапорта Мінск-2 і за гэта ім не аддалі грошы. Але рэч у тым, што ўжо пасля выканання гэтай замовы мы працавалі тры месяцы кожны дзень, і выпрацоўка была нармальная, як звычайна, але грошай нам усё роўна не плацілі. Куды сыходзілі грошы - нікому не вядома.

Журналіст charter97.org паспрабаваў удакладніць акалічнасці справы ў самога прадпрыемства «Мінскі дом вокнаў», у чым прычына такога стаўлення да сваіх былых супрацоўнікаў і як яны збіраюцца развязваць канфлікт. Дырэктара і спецыяліста ў сувязях з грамадскасцю на месцы не было, але ў прыёмнай пацвердзілі тое, што праблема ёсць і што развязваць яе, на жаль, пакуль ніхто не збіраецца.

- Так, ёсць такое. Але ж грошай няма! Да нас прыходзілі чыноўнікі з міністэрства працы, з дырэктарам гутарылі. Але калі няма грошай, то з чаго плаціць? Многія арганізацыі нам вінныя таму і мы вінныя. Але нам вінныя больш! Калі б усе нашы дэбіторы разлічыліся з намі, мы б разлічыліся са сваімі дэбіторамі і, у тым ліку, з работнікамі. Нам дагэтуль не аддалі грошы за вокны аэрапорта Мінск-2. Выканаўцам там быў «Гроднапрамбуд», той самы, дарэчы, які будуе атамную станцыю. Запазычанасці ёсць, плюс кіраўніцтва змянілася і новы дырэктар спрабуе гэтыя завінавачанасці «выбіць». Ці ёсць шанцы ў людзей убачыць свой заробак - не ведаю, бо гэта залежыць ад нашых дэбітораў, - сказалі ў прыёмнай.