Эстонцы выбіраюць парламент

У Эстоніі ў нядзелю пройдуць чарговыя выбары ў парламент.

Галасаванне пачалося а 9 гадзіне (10:00 паводле Менску) і завершыцца а 20 гадзіне (21:00 паводле Менску).

Як паведамілі "Інтэрфаксу" у рэспубліканскай выбарчай камісіі, падчас праведзенага ў краіне з 19 да 25 лютага датэрміновага галасавання ў выбарах ужо ўзялі ўдзел 296 109 чалавек, якія валодаюць правам голасу. З іх 176 491 чалавек прагаласавалі электронным шляхам. Традыцыйным спосабам на ўчастках з дапамогай бюлетэняў прагаласавалі 119 618 чалавек.

Гэта рэкордныя паказчыкі актыўнасці падчас датэрміновага галасавання. Так, на папярэдніх выбарах у 2011 годзе папярэдне аддалі свае галасы 250 043 выбаршчыкаў або 27,4% ад усяго ліку выбаршчыкаў. З іх электронным спосабам прагаласавалі 140 846 чалавек.

Вынікі датэрміновага галасавання будуць падлічаныя разам з вынікамі ў дзень асноўнага галасавання. Апытанні на выхадзе з выбарчых участкаў праводзіцца не будуць. На 101 месца ў вышэйшым органе заканадаўчай улады прэтэндуюць дзесяць партый і 13 незалежных кандыдатаў, усяго 876 кандыдатаў. У адыходзячым у адстаўку складзе парламента было чатыры партыі.

Паводле апытанняў грамадскай думкі, пераадолець 5-адсоткавы бар'ер і трапіць у парламент XIII склікання маюць шанец шэсць партый. У рэйтынгу папулярнасці лідуюць найбуйнейшая апазіцыйная партыя Цэнтра на чале з мэрам Таліна Эдгарам Савісаарам (Edgar Savisaar) і за якую традыцыйна галасуюць не толькі эстонцы, але і большасць рускамоўных грамадзян, а таксама партыя Рэформаў на чале з прэм'ер-міністрам Тааві Рыйвасам (Taavi Roivas).

У адрозненне ад муніцыпальных выбараў, у якіх могуць браць удзел і асобы без грамадзянства, што стала пражываюць у краіне, на парламенцкіх галасуюць толькі грамадзяне рэспублікі.

За ходам выбараў будуць назіраць больш за сто прадстаўнікоў з 15 краін. Ад Расеі чакаюцца прадстаўнікі арганізацыі "Голас". Каля двух тыдняў у Эстоніі за ходам падрыхтоўкі да выбараў ужо назіраюць прадстаўнікі АБСЕ/БДІПЧ (Бюро дэмакратычных інстытутаў і правоў чалавека).