Экс-прэм'ер Літвы: Барыс Нямцоў думаў пра палітычны прытулак

Андрус Кубілюс распавёў, што ў 2012 годзе Барыс Нямцоў баяўся за сваю бяспеку і выпытваў у яго пра магчымасць атрымаць палітычны прытулак у Літве.

Гэта размова адбылася падчас летняга лагера Кансерватыўнай партыі Літвы ў Рукле, калі палітыкі дыскутавалі пра будучыню Расеі, BBC са спасылкай на экс-прэм'ера Літвы.

"І потым адышлі ў бок, ён сам папрасіў пагаварыць асобна, таму што тады пасля буйных дэманстрацый у Маскве была пачатая "Балотная справа". Ён меркаваў, што Пуцін можа прымяніць да яго пакаранне. І спытаў, ці зможа ён у такім выпадку проста прасіць прытулку з сям'ёй у Літве", - заявіў Андрус Кубілюс.

Са слоў экс-прэм'ера, ён адказаў, што з атрыманнем палітычнага прытулку праблем не будзе, і прапанаваў Нямцову адразу застацца ў Літве. Аднак у выніку расейскі палітык адмовіўся.

"Баюся, але не моцна"

У лютым у адным са сваіх інтэрв'ю Барыс Нямцоў прызнаўся, што баіцца Уладзіміра Пуціна, але, як ён сказаў, не вельмі моцна.

"Але ўсё ж я не так моцна яго баюся. Калі б я баяўся вельмі моцна, то наўрад ці узначальваў бы апазіцыйную партыю, наўрад ці б займаўся тым, чым займаюся", - сказаў Нямцоў у інтэрв'ю расейскаму выданню "Суразмоўца".

Барыса Нямцова забілі позна ўвечары 27 лютага на Вялікім Маскварэцкім мосце ў Маскве недалёка ад Крамля. Паліцыя расследуе факт паводле артыкула аб забойстве.