За турпуцёўку з 1 сакавіка можна разлічыцца толькі рублямі
15- 1.03.2015, 14:41
- 22,279
Нацбанк абмежаваў разлікі ў валюце.
Гэта прадугледжана пастановай праўлення Нацыянальнага банка Рэспублікі Беларусь ад 3 лютага 2015 года №47 «Аб некаторых пытаннях выкарыстання замежнай валюты, каштоўных папер і (або) плацежных дакументаў у замежнай валюце пры правядзенні валютных аперацый», піша «Менск-навіны».
Як паведамілі ва ўпраўленні інфармацыі і грамадскіх сувязей Нацбанка, разлікі з фізічнымі асобамі ў замежнай валюце на тэрыторыі Беларусі выключаюцца:
- Пры вядзенні раздробнага гандлю і (або) паслуг на рэспубліканскіх аўтамабільных дарогах з нумарацыяй «М», «М/Е» і ў пунктах пропуску праз дзяржаўную мяжу Рэспублікі Беларусь;
- Вядзенне страхавой дзейнасці;
- Вядзенне турыстычнай дзейнасці;
- Рэалізацыі аўтамабільнага бензіну усіх марак, дызельнага паліва і звадкаванага газу.
Гэта азначае, што з гэтага часу за турпуцёўкі, страхоўкі, паліва на АЗС, а таксама тавары ў крамах на мяжы разлічыцца можна будзе толькі беларускімі рублямі.
Гэтая пастанова не распаўсюджваецца на выкарыстанне замежнай валюты ў разліках з фізічнымі асобамі пры вядзенні раздробнага гандлю ў крамах бяспошліннага гандлю, якія дзейнічаюць у адпаведнасці з Указам Прэзідэнта Рэспублікі Беларусь ад 22 красавіка 2014 №175 "Аб функцыянаванні крамаў бяспошліннага гандлю», а таксама пры выплаце фізічнымі асобамі страхавых узносаў у выпадках, устаноўленых Палажэннем аб страхавой дзейнасці ў Рэспубліцы Беларусь, зацверджаным Указам Лукашэнкі ад 25 жніўня 2006 г. №530 «Аб страхавой дзейнасці».