Мінспорту ўважае за магчымае падоўжыць выкарыстанне валюты ў разліках за турыстычныя паслугі

Міністэрства спорту і турызму Беларусі прапаноўвае падоўжыць тэрмін выкарыстання замежнай валюты пры разліках за турыстычныя паслугі.

Пра гэта ішла размова на нарадзе ў дэпартаменце турызму, паведамляе БелТА.

У нарадзе ўзялі ўдзел прадстаўнікі Нацбанку, Мінэканомікі, Мінгандлю, Рэспубліканскага саюза турыстычных арганізацый, Асацыяцыі турыстычных фірмаў пры Бізнэс-саюзе прадпрымальнікаў і наймальнікаў імя М.С.Куняўскага і буйных туркампаній. На сустрэчы абмяркоўваліся магчымыя паслабленні абмежаванняў выкарыстання пры разліках за турпаслугі замежнай валюты.

«Міністэрства спорту і турызму працягвае сачыць за сітуацыяй у сферы валютнага рэгулявання, прытрымліваючыся пры гэтым пазіцыі захавання ў турыстычных кампаній магчымасці правядзення валютных аперацый з фізічнымі асобамі ў замежнай валюце да заканчэння гэтага турыстычнага сезону», - адзначылі ў міністэрстве.

Спецыялісты мяркуюць, што абмежаванне выкарыстання валютных сродкаў у турыстычнай сферы можа прывесці да вельмі сур'ёзных наступстваў, пачынаючы ад адтоку валюты з краіны і заканчваючы падзеннем попыту на турпаслугі, прапанаваныя беларускімі кампаніямі.

Нагадаем, у Беларусі з 1 сакавіка аплачваць турыстычныя паслугі можна толькі ў нацыянальнай валюце. У выпадку скасавання з турагенцтвамі дамоваў, укладзеных да 1 сакавіка, грамадзяне могуць атрымліваць кампенсацыю ў замежнай валюце.