Пяскоў: Пуцін здаровы

Прэс-сакратар прэзідэнта Расеі Дзмітрый Пяскоў зняпраўдзіў чуткі пра хваробу Уладзіміра Пуціна.

Як паведамляе Lenta.ru са спасылкай на Bloomberg, Дзмітрый Пяскоў запэўніў, што кіраўнік РФ знаходзіцца ў «выдатным здароўі».

Раней са здагадкай аб пагаршэнні здароўя Пуціна выступіла крыніца агенцтва Reuters у казахстанскім ўрадзе.

«Быццам бы ён (Пуцін) захварэў», - падкрэслілі ў Астане, дзе 13 сакавіка павінна было адбыцца пасяджэнне з удзелам Нурсултана Назарбаева, Уладзіміра Пуціна і Аляксандра Лукашэнкі. Аднак за некалькі гадзін да вылету Уладзіміра Пуціна ў Казахстане стала вядома, што саміт адкладзены.

Чуткі пра хваробу Пуціна з'яўляюцца на старонках заходніх сродкаў масавай інфармацыі рэгулярна. Упершыню журналісты загаварылі аб праблемах са здароўем кіраўніка дзяржавы паводле вынікаў саміту АТЭС ва Уладзівастоку ў верасні 2012 года, дзе заўважалі, што прэзідэнт кульгае.

Месяцам пазней Reuters выступіла з здагадкай, што ў Пуціна сур'ёзныя праблемы са спіной, якія «могуць запатрабаваць хірургічнага ўмяшання». Тады агенцтва таксама спасылалася на скасаванне шэрагу замежных візітаў і падкрэслівала, што звесткі аб хваробе прэзідэнта атрыманыя ад трох крыніц у Крамлі. Каментуючы здагадку журналістаў, прэс-сакратар кіраўніка дзяржавы Дзмітрый Пяскоў заявіў, што «ананімным крыніцам давяраць не варта».