Тайсан назваў украінца лепшым баксёрам Усходняй Еўропы

Абсалютны чэмпіён свету Майк Тайсан назваў украінца Васіля Ламачэнку лепшым баксёрам Усходняй Еўропы.

Пра гэта паведамляе «24 канал».

«Мой былы трэнер Кас Д'Амата, калі б ён быў жывы, палюбіў бы гэтага хлопца. Абарона - вось, што вылучае яго», - заявіў Тайсан.

Са слоў амерыканца, Ламачэнка знаходзіцца на першым месцы ў ягоным асабістым рэйтынгу лепшых усходнееўрапейскіх баксёраў, нягледзячы на поспехі расейскага чэмпіёна паводле версіяў WBO, WBA і IBF у паўцяжкай катэгорыі Сяргея Кавалёва і казахстанца Генадзя Галоўкіна, які валодае тытуламі WBC, IBO і WBA у сярэдняй вазе.

Ламачэнка з'яўляецца чэмпіёнам паводле версіі Сусветнай баксёрскай арганізацыі (WBO) у паўлёгкай вазе (да 57,2 кілаграм). На прафесійным рынгу 27-гадовы ўкраінец атрымаў тры перамогі і пацярпеў адну паразу. У аматарскай кар'еры ён правёў 396 баёў, у якіх саступіў толькі аднойчы Баксёр таксама здабыў два залатыя медалі на Алімпіядах у Пекіне і Лондане. На гэты момант ураджэнец Адэскай вобласці пражывае ў Лос-Анджэлесе.