Журналісты знайшлі схованку расейскіх «інтэрнэт-троляў»

Кантора размешчаная ў адным са спальных раёнаў Пецярбурга.

У Пецярбургу існуе агенцтва, якое, прынамсі, за 20 мільёнаў рублёў (320 тысяч даляраў) у месяц малюе карыкатуры на Абаму і забяспечвае каментарамі сайты ўсіх папулярных расейскіх медыя. Інфармацыйны партал навінаў MR7.ru ўпершыню апублікаваў фота, відэа і дакументы са схованкі троляў.

Кантора размешчаная ў адным са спальных раёнаў Пецярбурга на вуліцы Савушкіна ў шэрым чатырохпавярховым будынку без шыльд і апазнавальных знакаў, паведамляе выданне. Як прызнаўся адзін з былых сеткавых наймітаў, адзіным крытэрам пры прыёме на працу з'яўляецца пытанне: як вы ставіцеся да дзейнай улады?

"Кажуць, яшчэ правяраюць паводле паліцэйскай базы, судзімы чалавек ці не. Валоданне літаратурнай расейскай мовай не абавязковае: на Савушкіна ёсць свой педагог, барадаты інтэлігентны мужчына, які раздрукоўвае асабліва непісьменныя паведамленні, паказвае ўсім і ўздыхае. Супрацоўнікі агенцтва не надта схільныя мець стасункі адзін з адным. За найменшую правіннасць, напрыклад, сыход з працы раней на адну хвіліну, штрафуюць. Адток вялізны. Сядзіш у сталовай і здзіўляешся: хто ўсе гэтыя людзі... Студэнты, былы вядомы радыёвядоўца, інваліды, нефармалы, скіны, хатнія гаспадыні, нават шлюбныя пары", - распавядае адзін з супрацоўнікаў Аляксей.

Паводле звестак выдання, праца ў канторы кругласутачная. "Мне ўдалося паглядзець, як начная брыгада троляў мяняе дзённую. За паўгадзіны ў офіс "Інтэрнэт-даследаванняў" прыйшлі 124 чалавекі. Яны разбрыліся па кабінетах, дзверы ў якія, паводле ўнутранай інструкцыі, павінны быць зачыненыя, а вокны - завешаныя жалюзі", - гаворыцца ў артыкуле.

"За аднымі дзвярыма, людзі, якія каментуюць навіны, па зацверджаных лякалах і па такім жа кошце. Перыядычна лекцыі ў такіх супрацоўнікаў чытаюць спецыяльна запрошаныя, не занадта публічныя палітолагі. Каментатары праходзяць пісьмовыя тэсты на лаяльнасць і разуменне сітуацыі. Пытанні складаныя, напрыклад, пра палітычную абстаноўку ў Сірыі і Іране. За іншымі дзвярыма мастакі малююць Навальнага і Абаму, дакладней, прыстаўляюць галовы палітыкаў да тулава жывёл", - піша выданне.

У распараджэнне MR7.ru патрапілі тэхнічныя выданні на паведамленні і каментары і іншыя дакументы, якія праліваюць святло на дзейнасць "Інтэрнэт-даследаванняў". Адзначаецца, што "самы вялікі масіў тэхзаданняў ахоплівае перыяд з 28 лютага да 7 сакавіка 2015 г. - адразу пасля забойства Барыса Нямцова".

"Калі забілі Нямцова, праца "крэмляботаў" перабудавалася: яны перасталі ганьбіць Украіну (гэта іх руцінная штодзённая праца) і былі перакінутыя на забойства, - гаворыць адкрыта Аляксей. - Калі вы тады сачылі за навінамі, то маглі бачыць пад усімі тэкстамі пра забойства Нямцова сотні, а дзе і тысячы каментароў, дзе рознымі словамі паўтараліся адны і тыя ж тэзісы: забойства - гэта правакацыя, Крэмль тут ні пры чым, гэта апазіцыя забіла свайго, каб прыцягнуць пабольш народу на марш. Гэта быў танец на касцях, які працягваецца і цяпер. Нават калі хто-небудзь з іх шчыра пашкадаваў пра забітага - праца ёсць праца".