У аптэку будзем хадзіць без рэцэпту, але з пашпартам?

Да канца гэтага года ўсе паліклінікі Менска пяройдуць на электронныя рэцэпты.

АБ гэтым заявіў міністр аховы здароўя Васіль Жарко. З ягоных слоў, гэта новаўвядзенне здыме нагрузку з лекараў, піша «Комсомольская правда в Беларуси».

Рэцэпт у электронным выглядзе - гэта і эканомія паперы і часу, і аператыўная сувязь з аптэкамі. Гэта значыць лекар выпісвае вам на кампутары рэцэпт на пэўныя лекі, ніякай паперкі на рукі не выдае, а інфармацыя аб прызначэнні тут жа паступае ва ўсю аптэчную сетку. У якую б аптэку вы ні прыйшлі, дастаткова будзе назваць сваё прозвішча або прад'явіць дакумент, напрыклад пашпарт або правы кіроўцы, - пытанне ідэнтыфікацыі асобы яшчэ дапрацоўваецца. Аптэкар усё праверыць у кампутары, і калі прызначаныя лекарам лекі ёсць у наяўнасці, то выдасць вам.

З часам, пры дастатковым фінансаванні, на электронныя рэцэпты пяройдуць паліклінікі ва ўсёй краіне. Так яшчэ больш узмоцніцца кантроль за водпускам рэцэптурных лекаў. З чым, дарэчы, паспяхова справілася і пастанова Міністэрства аховы здароўя №66, прынятая ў кастрычніку мінулага года.

- Пасля прыняцця пастановы паток грамадзян за лекамі паменшыўся і абарачэнне рэалізацыі рэцэптурных лекавых сродкаў таксама, асабліва ў недзяржаўных аптэках, - распавёў Васіль Жарко. - Калі дзяржаўная аптэчная сетка выконвала ўсе правілы водпуску лекаў, то прыватныя «грашылі». Але гэта адзінкавыя выпадкі. Больш за 99% аптэк усіх формаў уласнасці добрасумленна выконвалі пастанову. За парушэнні правілаў водпуску лекаў у гэтым годзе была прыпыненая праца ўсяго блізу 20 аптэк.