Працоўных «Гомельскага завода ліцця і нармалей» адпраўляюць у адпачынкі

У аддзеле кадраў кажуць, што працы няма.

Чытач charter97.org з Гомеля распавёў пра тое, як ідуць справы на гомельскім заводзе ААТ «Гомельскі завод ліцця і нармалей».

«Кіраўніцтва ААТ ГЗЛіН, якое ўваходзіць у холдынг «Гомсельмаш», прымушае сваіх работнікаў практычна кожную пятніцу і панядзелак пісаць заявы на адпачынак без захавання заробку.

Дырэктар ААТ ГЗЛіН Анатоль Квітанаў заяўляе, што на прадпрыемстве ўсё добра, што работнікі пішуць заявы самі і іх ніхто не прымушае. І гэта ў той час, калі ААТ «Гомсельмаш» усё ж такі выплачвае сваім супрацоўнікам 2/3 акладу. Але на ЗЛіНе, мабыць, дырэктар і кіраўніцтва вельмі баяцца страціць свае месцы, і гатовыя папросту пакінуць людзей без сродкаў да існавання.

Так званая прафсаюзная арганізацыя, на чале з яе нязменным «лідарам» Мікалаем Малахавым, даўно ператварылася ў паразітуючую істоту наўпрост на супрацоўніках прадпрыемства. Ніякай дапамогі і падтрымкі ад іх няма. Усе пастановы кіраўніцтва, якія парушаюць умовы кантрактаў і пагаршаюць становішча работнікаў грамадства падпісваюцца гэтымі «абаронцамі» вельмі лёгка і хутка. Таксама ідзе і так званая «аптымізацыя», - напісаў рабочы.

На заводзе сайту charter97.org сітуацыю пракаментавалі так: працы няма, таму супрацоўнікі «ўсё разумеюць» і «добраахвотна ўсе падпісваюць».

«Калі ў нас у гэты дзень няма працы - людзі на працу не прыходзяць. Плюс для кожнага цэха ўводзіцца сярэдняспісачная колькасць, якую трэба выканаць. Таму заявы трэба пісаць, вядома.

Разумееце, калі ў нас працуе 5000 чалавек, а прадукцыі яны вырабляюць, дапусцім, на 5 мільёнаў. І калі ўсе будуць прыходзіць на працу кожны дзень, калі няма працы - прыйдуць і будуць проста сядзець. І што ў выніку атрымаецца? Рабочым заплацяць грошы, а адкуль іх плаціць? Завод будзе ў страце. Таму, каб работнікаў хоць нейкім чынам падтрымаць, у нас увялі гранічны ўзровень сярэднеспісачнай колькасці. Усе гэта разумеюць і кожны месяц па 2-3 дні, часам больш, пішуць добраахвотна заявы за свой кошт і развязваюць нейкія свае хатнія пытанні», - сказалі ў аддзеле кадраў.