Уладзімір Агрызка: Галоўная праблема Крамля - распад Расеі

Адна з самых сур'ёзных унутраных праблем Расеі - яе шматнароднасць.

Аб гэтым піша ўкраінскі дыпламат, міністр замежных спраў Украіны з 2007 да 2009 года Уладзімір Агрызка на сайце «Новы час».

«Расея працягвае заставацца краінай, якая так і не змагла сфармавацца ў адзіную нацыю. РФ - гэта кангламерат народаў, якія ў свой час, нягледзячы на ўсе бясплодныя спробы стварыць «адзіны савецкі народ», так і не пераплавіліся ў гіганцкім катле, які сабой уяўляў СССР.

З такімі ж праблемамі сутыкаюцца цяперашнія лідары дзяржавы, якія актыўна займаюцца фармаваннем адзінай расейскай ідэнтычнасці. Як бы сяму-таму гэтага не хацелася, адзінага народа не атрымліваецца. Таму неўзабаве Маскву чакае вельмі складаны перыяд, і прычынай цяжкасцяў стане разнамасная РФ, адрозненні ў тэмпах развіцця асобных рэгіёнаў, велізарная тэрыторыя, якой аб'ектыўна вельмі складана кіраваць, рознавектарнымі суб'ектамі федэрацыі - да прыкладу, Сібірру ці Далёкім Усходам, якія ў сілу геапалітычных фактараў шукаюць сабе партнёраў бліжэй і маюць больш моцныя сувязі з той жа КНР, чым з уласнай сталіцай.

Усё гэта пагражае цэласнасці Расеі куды больш, чым якія-небудзь фантомныя болі, якія РФ адчувае з нагоды «страчаных» пасля развалу СССР тэрыторый. Не кажучы ўжо пра абсалютна фантастычныя пагрозы, якія яна бачыць з боку Захаду. На гэтым фоне ўсё, што адбываецца ў Чачэніі і на Паўночным Каўказе агулам - толькі элемент агульнай унутранай нестабільнасці.

Можна спрагназаваць, што неўзабаве маскоўскаму кіраўніцтву прыйдзецца куды больш увагі надаваць пытанню адзінства ўласнай дзяржавы, чым авантур, якія пуцінскі рэжым арганізаваў і працягвае праводзіць на ўсходзе Украіны», - піша Уладзімір Агрызка.

Зразумела, пад пагрозай аддзялення будзе не толькі Каўказ.

«Занадта ўжо вялікая краіна, занадта шмат народаў і народнасцяў у яе ўваходзяць. І на пэўным этапе развіцця перад кожным з гэтых народаў паўстане пытанне: чаму мы не можам рэалізоўваць сваё законнае права на самавызначэнне. Корань праблем РФ - не ў Каўказе, а ў тым, што Расейская імперыя, паглынаючы чарговыя тэрыторыі, не прыносіла ім нічога, акрамя прыгнёту. Таму рэакцыя народаў, якія цяпер з'яўляюцца часткай РФ, будзе адпаведнай - гэта толькі пытанне часу.

У нейкі момант цэнтрабежныя тэндэнцыі, якія цяпер душацца адміністрацыйнымі метадамі, стануць занадта яскрава выяўленымі, каб з імі можна было разабрацца ўручную, і тады шанцаў на захаванне цэласнасці ў Расеі, не застанецца», - адзначае ён.

Фота: PHL