Аляксандр Хацкевіч вызначыў склад каманды на сакавіцкія матчы

Новы трэнерскі штаб нацыянальнай каманды Беларусі ў футболе вызначыўся са складам на сакавіцкія матчы з камандамі Македоніі і Габона.

На будучыя гульні выкліканыя 23 гульцы, паведамляе БелТА.

Брамнікі - Андрэй Гарбуноў ("Атрамітас", Афіны, Грэцыя), Юрый Жаўноў ("Тарпеда", Масква, Расея), Сяргей Чэрнік (БАТЭ, Барысаў);

абаронцы - Максім Жаўнерчык, Дзяніс Палякоў, Максім Валадзько (усе - БАТЭ, Барысаў), Ігар Шытаў ("Мардовія", Саранск, Расея), Аляксандр Мартыновіч ("Краснадар", Расея), Сяргей Паліцэвіч ("Дынама", Менск), Ягор Філіпенка ("Малага", Гішпанія), Максім Бардачоў ("Растоў", Расея);

паўабаронцы - Іван Маеўскі ("Завіша", Быдгашч, Польшча), Сяргей Кісляк ("Рубін", Казань, Расея), Сяргей Крывец ("Мец", Францыя), Антон Пуціла ("Тарпеда", Масква, Расея), Аляксандр Глеб ("Генчлербірлігі", Анкара, Турцыя), Станіслаў Драгун ("Крылы Саветаў", Самара, Расея), Цімафей Калачоў ("Растоў", Расея), Міхаіл Гардзяйчук, Ігар Стасевіч (абодва - БАТЭ, Барысаў), Павел Няхайчык ("Том", Томск, Расея);

нападнікі - Мікалай Януш ("Шахцёр", Салігорск), Сяргей Карніленка ("Крылы Саветаў", Самара, Расея).

У складзе два дэбютанты: 31-гадовы галкіпер Андрэй Гарбуноў і 26-гадовы паўабаронца Іван Маеўскі, якія апошнім часам паспяхова гуляюць за свае клубы ў чэмпіянатах Грэцыі і Польшчы. Пасля некаторага перапынку ў галоўную каманду краіны зноў запрошаны дасведчаны 33-гадовы паўабаронца Аляксандр Глеб.

Кандыдаты ў нацыянальную каманду Беларусі збяруцца ў Менску 23 сакавіка, а затым адправяцца ў Скоп'е, дзе 27 сакавіка правядуць адборачны матч чэмпіянату Еўропы-2016 супраць каманды Македоніі. Для абодвух спаборнікаў гэта будзе пяты паядынак у кваліфікацыйнай групе С кантынентальнага першынства. Беларусы летась стартавалі вельмі няўдала, згуляўшы ўнічыю з камандай Люксембурга - 1: 1 (у гасцях) і зведаўшы тры паразы: ад Украіны - 0: 2 (дома), Славаччыны - 1: 2 (дома) і Гішпаніі - 0: 3 (у гасцях). Македонцы пачалі еўракваліфікацыю трохі лепей: атрымалі перамогу над Люксембургам - 3: 2 і тройчы саступілі: Гішпаніі - 1: 5 (у гасцях), Украіне - 0: 1 (у гасцях) і Славаччыне - 0: 2 (дома). Становішча каманд у групе С пасля чатырох тураў такое: Славаччына - 12 балаў (розніца мячоў - 8-2), Гішпанія - 9 (13-3), Украіна - 9 (6-1), Македонія - 3 (4-10), Беларусь - 1 (2-9), Люксембург - 1 (3-11).

Пасля гульні ў македонскай сталіцы беларускі футбольны дэсант перабярэцца ў Турцыю і 30 сакавіка ў Белеку правядзе таварыскі матч з нацыянальнай камандай Габона.

Фота: fcdynamo.kiev.ua