Вядомага менскага блогера выклікаюць у міліцыю

Журналіст і блогер Глеб Лабадзенка сутыкнуўся з дзіўнымі метадамі, якімі скарыстаўся міліцыянт з Савецкага РАУС Менска.

«Мне патэлефанаваў чалавек, паведаміў, што ён з міліцыі і сказаў, каб я прыйшоў да іх на размову. Я, натуральна, спытаў, з якой прычыны, якой будзе размова. Ён кажа: «Я не магу вам гэтага сказаць. Гэта таямніца следства», - распавядае «Еўрарадыё» Лабадзенка.

Суразмоўца паведаміў, што тэлефон журналіста трапіў у зону, дзе было ўчыненае злачынства і заявіў пра намер правесці апытанне: «Можа быць, вы што-небудзь бачылі...». Лабадзенка ў гэтыя дні заняты важнымі сямейнымі і працоўнымі клопатамі, таму прапанаваў выслаць яму афіцыйную позву ці непасрэдна прыехаць да яго і пагутарыць.

«Тады суразмоўца кажа: «Калі вы не хочаце ісці, значыць, вам ёсць што хаваць. Я ўсіх абзвоньваю і ўсе ідуць. Гэта - адмова супрацоўніцтва са следствам. Я вам прапаноўваў «па-добраму», а калі вы не хочаце, будзьце гатовыя, што да вас прыедуць «у вельмі нязручны ранні час», каб забраць вас і апытаць», - распавёў Лабадзенка.

Журналіст і блізка не падазрае, аб якім злачынстве вялася гаворка, бо калі раней сутыкаўся з парушэннямі закона, тут жа пра іх паведамляў праваахоўнікам. Таксама Лабадзенку здзівіла, што адмова прыехаць без позвы стала падставай, каб яго ў нечым падазраваць. Дзе ж прэзумпцыя невінаватасці? А ў кіўках аб прыездзе ў «нязручны час» блогер бачыць перавышэнне паўнамоцтваў і наўпроставую пагрозу.

«Самы галоўны аргумент быў: усе пагадзіліся прыйсці, а ты тут упарцішся. І я думаю, што пра такія рэчы трэба казаць уголас, бо гэта бяспраўе, беззаконне, - мяркуе блогер. - Ціснуць на тое, што людзі не ведаюць сваіх правоў і ім можна патэлефанаваць і сказаць «бяжы да нас на іншы канец горада». Я думаю, што праваахоўнікі абавязаныя выконваць тыя нормы, якія самі прыдумалі. А калі міліцыя сапраўды мае права прыехаць і забраць чалавека ў міліцыю за тое, што ён адмовіўся без афіцыйнай позвы пасля званка з'явіцца ў кабінет супрацоўніка, то хацелася б, каб гэтае пытанне беларусам патлумачылі».

У прэс-службе ГУУС Менгарвыканкама на момант падрыхтоўкі матэрыялу не змаглі пракаментаваць праблему.

У частцы другой артыкула 192 Крымінальнага кодэкса сказана: «Справаводства следчых дзеянняў у начны час не дапускаецца, за выключэннем выпадкаў, якія не могуць адкладацца». Але рэч не толькі ў гэтых дробных юрыдычных нюансах.

Пятага сакавіка Аляксандр Лукашэнка пазначыў праблему «пыхі і фанабэрыі», якую людзі ў пагонах часам дапускаюць у дачыненні да звычайных грамадзян. Не прайшло і тыдня, як аўтарытэтны журналіст непасрэдна сутыкнуўся з чымсьці падобным.