На Вануату абрынуўся самы магутны ў гісторыі цыклон
- 14.03.2015, 12:26
- 9,893
На выспу Вануату абрынуўся цыклон, які сіноптыкі называюць адным з самых моцных за ўсю гісторыю назіранняў у паўднёвай частцы Ціхага акіяна.
Астраўлян папярэдзілі пра тое, што сіла ветру ў цыклоне "Пэм" можа дасягаць 250 кіламетраў на гадзіну і існуе небяспека моцных ліўняў і паводак, перадае BBC.
Хоць тысячы людзей схаваліся ў спецыяльных сховішчах, многія былі заспетыя стыхіяй у іх дамах.
Афіцыйных звестак аб ахвярах стыхіі няма, аднак паводле паведамленняў супрацоўнікаў Управы каардынацыі гуманітарных пытанняў ААН, ахвярамі цыклона толькі ў адной правінцыі Пенама сталі 44 чалавекі, паведамляе Reuters.
Метэаролагі папярэджвалі, што "Пэм" можа стаць самым разбуральным цыклонам у гісторыі Ціхаакіянскага рэгіёну. Урад краіны ўжо паведаміў, што мае намер звярнуцца па міжнародную дапамогу для пераадолення наступстваў гэтага стыхійнага бедства.