Праз выпальванне травы ў Гомелі стаіць пах гару
1- 16.03.2015, 10:15
- 4,059
Жыхары некаторых раёнаў Гомельскай вобласці апынуліся, быццам у тумане, у самім жа абласным цэнтры з'явіўся пах гару.
У рэгіёне гарыць сухая трава, паведамляе тэлеканал АНТ.
Толькі за некалькі дзён ратавальнікі ліквідавалі больш за 150 ачагоў. 130 гектараў лясной зоны і тэрыторыі каля вёсак пакрытыя попелам. Акрамя гэтага, пажары, што пачаліся з узгарання травы і кустоў, знішчылі больш за дзесятак будынкаў.
Каб спыніць вясновыя палы, выратавальнікі адправіліся ў рэйды і праводзяць тлумачальную працу з жыхарамі. Менавіта падпальванне травы вяскоўцамі, на іх думку, з'яўляецца галоўнай прычынай усіх узгаранняў. За распальванне вогнішчаў парушальнікам пагражае штраф да сарака базавых велічынь, а гэта ні многа ні мала - больш за сем мільёнаў рублёў.
Адзін такі выпадак ужо скончыўся трагедыяй у Берасцейскай вобласці. У агні загінуў пенсіянер. Сярод пацярпелых - жыхары Гомельскай і Магілёўскай абласцей.