Мэксіка заплаціць стваральнікам фільма пра Бонда за «правільны» вобраз краіны
1- 16.03.2015, 21:33
- 4,533
Мэксіка гатовая падтрымаць здымкі фільма «007:Спэктар», надаўшы кампаніям Sony Pictures і MGM Studios падатковыя льготы на суму да $20 млн.
У гэтым выпадку студыі павінны падаць краіну ў выключна станоўчым святле, ёсць і іншыя ўмовы. Сярод іншага, згодна з першапачатковым варыянтам сцэнару, адной з ахвяр забойства становіцца «мэр Мэхіка»: улады папрасілі называць яго ў кадры «міжнародным лідэрам», паведамляе onliner.by.
Таксама кіраўніцтва краіны просіць перайменаваць «мэксіканскую паліцыю», што фігуруе ў стужцы, у «аддзел спецыяльнага прызначэння». Акрамя таго, на ролю адной з «дзяўчат Джэймса Бонда» прапанаваная «вядомая мэксіканская актрыса». Таксама прапанавана адкарэктаваць вобраз галоўнага злыдня, які не павінен быць мэксіканцам.
Бонус стваральнікам фільма пра Джэймса Бонда прапаноўваўся і ў тым выпадку, калі ў кадрах будуць мільгаць сучасныя сталічныя збудаванні, піша The Washington Post, гучалі і іншыя прапановы.
Паказ 24-га лікам фільма пра Джэймса Бонда стартуе 6 лістапада 2015 года. У ролі Q выступіць Бэн Уішоў, Наомі Гарыс сыграе Міс Маніпэні, таксама ў праекце бяруць удзел Крыстоф Вальц, Дэніэл Крэйг і Моніка Бэлучы, якая сыграе адну з сябровак Бонда, на мінулым тыдні да іх далучылася мэксіканка Стэфані Сігман.