Расея і Паўднёвая Асеція падпісалі дамову аб хаўрусе
6- 18.03.2015, 16:30
- 6,414
Прэзідэнты Расеі і непрызнанай Паўднёвай Асеціі падпісалі 18 сакавіка дамову аб хаўрусе і інтэграцыі.
Перад падпісаннем Уладзімір Пуцін і Леанід Цібілаў абмеркавалі пытанні двухбаковых стасункаў, а таксама каардынацыю ў сферы забеспячэння стабільнасці і бяспекі ў Закаўказскім рэгіёне, паведамляе ТАСС.
«Сёння зроблены яшчэ адзін важны крок на шляху далейшага ўмацавання партнёрскіх сувязяў», - заявіў Пуцін.
Дамова паміж Расеяй і Паўднёвай Асеціяй укладаецца на 25 гадоў з магчымасцю працягваць яе на дзесяцігадовыя перыяды. Гэта аснова для паэтапнага ўстанаўлення больш цеснага супрацоўніцтва двух бакоў у сацыяльнай, эканамічнай і гуманітарнай сферах, а таксама ў пытаннях замежнай палітыкі, абароны і бяспекі.
Паводле дамовы, Расея бярэ на сябе ахову межаў «рэспублікі», уводзіцца адзіны мытны кантроль. Таксама ў Паўднёвай Асеціі падвышаюцца пенсіі і сярэдні заробак да ўзроўню паўночнакаўказскіх рэгіёнаў Расеі.
Самаабвешчаная «рэспубліка» ў 2008 годзе была афіцыйна прызнаная Расеяй. Большасць краін свету ўважаюць яе за тэрыторыю Грузіі.
17 сакавіка прадстаўніца Дзярждэпу ЗША Джэйн Псакі заявіла, што Злучаныя Штаты не прызнаюць гэта пагадненне.