У Талачыне бюджэтнікаў абавязалі купляць беларускія прадукты на 250 тысяч

Прычына - няма чым плаціць заробкі ў калгасах.

У сельскай гаспадарцы няпростая сітуацыя, а трэба праводзіць пасяўную. Дзе ўзяць грошы? У рэдакцыю onliner.by прыйшоў ліст з Талачынскага раёна. Аксана Сяргееўна, працаўніца бюджэтнай арганізацыі, распавяла аб схеме, якую зноў рэанімавалі ў глыбінцы. Сутнасць, з ейных слоў, простая: людзей «настойліва просяць» атаварвацца на фіксаваную суму айчыннай ежай. У райвыканкаме, куды мы звярнуліся па каментар, інфармацыю аб «абавязалаўцы» катэгарычна адмаўляюць.

- Кіраўнікоў арганізацый выклікалі ў райвыканкам і выдалі распараджэнне, што кожны работнік, ад прыбіральшчыцы да начальства, абавязаны штомесяц купляць набор прадуктаў мясцовай вытворчасці, - распавядае Аксана. - Першапачаткова называлася сума 300 тыс. за месяц, а для начальства - наогул 1 млн. Ініцыятыва гэта мясцовай улады або абласной - невядома. Але распараджэнне дакладна закранула медыкаў, работнікаў культуры, адукацыі і іншых. Фактычна ва ўсім раёне, невядома толькі пра міліцыю, напрыклад. У якасці прычын агучвалася тое, што працаўнікам калгасаў няма чым плаціць заробак.

- Першапачаткова гаварылася, што можна будзе пайсці ў краму, узяць прадуктаў на гэтыя 300 тыс. І даць справаздачу чэкамі, - працягвае чытачка. - Паводле факту ж высветлілася так: калгас прывозіць «падшэфнай» арганізацыі вельмі абмежаваны набор прадуктаў, у асноўным мясных - рулеты, тушонку, куры, каўбасы. Гаварылася, што ўсё гэта будзе рэалізоўвацца без гандлёвай нацэнкі, са зніжкай прыкладна 20%. Але пры параўнанні коштаў з крамнымі яны атрымаліся аднолькавымі амаль па ўсіх пазіцыях. Танней толькі некаторыя гатункі прадукцыі. Ёсць сярод прадуктаў нават тыя, тэрмін прыдатнасці якіх мінае праз 3 дні. Затое абавязковую суму знізілі да 250 тыс. Прадукты «рэалізуюцца» пад подпіс.

Схема атрымліваецца такая: калгасы Талачынскага раёна пастаўляе сыравіну такім прадпрыемствам, як Аршанскі мясакамбінат, Лепельскі малочны камбінат і інш. Тым няма чым з імі расплачвацца, калгаснікі не атрымліваюць заробак, вось і знайшлі такі арыгінальны выхад. Колькі гэта будзе доўжыцца - не паведамляецца, ходзяць розныя чуткі - ад 3 месяцаў да года. З нагоды санкцый у дачыненні да тых, хто адмовіцца, пакуль таксама нічога не вядома. У маёй арганізацыі ніхто не адважыўся адмаўляцца: усе хочуць працаваць. Непасрэдна звальненнямі не пагражалі, але ўсім зразумела, што лепш не пярэчыць.

Каментар выканкама

- Давайце расставім кропкі над «і», - кажа першы намеснік старшыні райвыканкама Сяргей Стальмахаў. - Тыя людзі, якія кажуць сёння аб тым, што мы «абавязалі іх купіць прадукцыю», не маюць рацыю. Сёння не разглядаецца пытанне ні на якім узроўні, што нейкі грамадзянін абавязаны прыйсці і купіць. Мы проста прапануем нашым бюджэтным арганізацыям набыць прадукцыю на выгадных умовах, па коштах ніжэйшых за раздробныя. Няма такога - ты павінен купіць гэтую каўбасу, і ўсё.

- Ад пакупак можна адмовіцца?

- Натуральна! І ніякіх пераследаў і т. п. Не будзе.

- Але людзі чамусьці хвалююцца...

- Людзей хвалюе пытанне, таму што інфармацыя няправільная пайшла. Вось я сабе ўжо купіў, многія купілі. Чым сёння купляць у краме мяса па 200 тысяч за кілаграм, лепш узяць па 120 тысяч, ці не так? Тым больш гэта не прадукцыя, якая валяецца на складах, а свежая, з усімі неабходнымі сэртыфікатамі.

- І ўсё ж - у чым патрэба такой схемы?

- Такі гандаль - гэта выхад для сялян, з якімі сёння мясамалпрам не разлічваецца жывымі грашыма, а кажа: бярыце ў нас прадукцыю, а яе потым рэалізоўваць каму заўгодна і выжываць. Гэта проста выхад з сітуацыі, якая склалася...