«Коммерсант»: Камеры на месцы забойства Нямцова былі выключаныя

Камеры назірання на месцы забойства Барыса Нямцова маглі быць адключаныя на рамонтныя работы.

Пра гэта сцвярджае газета «Коммерсант».

Выданне падкрэслівае, што знайсці аўтамабіль, на якім схаваўся з месца злачынства забойца Барыса Нямцова, па «гарачых слядах» не атрымалася ў тым ліку таму, што сведка забойства не змагла назваць ягоную марку.

Першапачаткова ў вышук былі абвешчаныя некалькі аўтамабіляў белага колеру розных марак. Усе іх выявілі і высветлілі, што машыны ніякага дачынення да злачынства не маюць. У нядзелю, 1 сакавіка, ДІБДР правярала ў асноўным машыны чырвонага колеру, піша газета.

Падчас даследавання гільзаў, пакінутых на месцы забойства Барыса Нямцова ў Маскве, следства высветліла, што чатыры з выпушчаных у палітыка куль былі зробленыя ў 1986 годзе на Юрузанскім механічным заводзе. Яшчэ дзве кулі - вытворчасці Тульскага патроннага завода - былі вырабленыя ў 1992 годзе, піша «Медуза».

Выкарыстанне старых патронаў можа казаць аб тым, што ў злачынцаў не было доступу да вялікай колькасці боепрыпасаў. Выкарыстанне патронаў розных заводаў павышае імавернасць асечкі, адзначае «Коммерсант».

Таксама, паводле звестак выдання, падчас следства была зробленая здагадка, што ў Нямцова маглі страляць не з пісталета Макарава, як паведамлялася раней, а з падобнага з ім газавага пісталета «Іж», пераробленага пад стральбу баявымі патронамі. З такой жа зброі ў 2006 годзе была застрэленая журналістка Ганна Паліткоўская. Версія аб інструменце забойства канчатковай не з'яўляецца.

Акрамя таго, удзельнікі расследавання адзначаюць, што за Нямцовым гэтак жа, як у свой час за Паліткоўскай, доўга сачылі, пакуль яны не апынуліся ў зручных для нападу месцах. У выпадку з палітыкам не выключана, што ўмовай заказчыка было менавіта забойства, учыненае з відам на Крэмль.

Барыс Нямцоў быў застрэлены ў ноч на 28 лютага на Вялікім Маскварэцкім мосце ў Маскве. У Нямцова трапілі чатыры кулі, адно з раненняў - у сэрца - было смяротным. Паводле версіі следства, забойства было на замову, канчатковай версіі аб ягоных матывах пакуль няма. Падазроныя не затрыманыя.

Момант забойства Нямцова засняла камера тэлеканала ТВЦ. Здымка вялася здалёк, і на відэа абставіны забойства дрэнна адрозныя.

1 сакавіка ў Маскве адбылося шэсце памяці Барыса Нямцова, удзел у якім бралі больш за 50 тысяч чалавек.