Топ-30 вуліц Менска з самым танным жыллём

У Менску склалі спіс вуліц з самымі нізкімі коштамі жылля.

Першае месца ў рэйтынгу заняла вуліца з гаворачай назвай Перадавая. Пра гэта charter97.org паведаміў намеснік начальніка аддзела ўправы продажаў другаснага рынку жылля агенцтва нерухомасці «Твая сталіца» Арцём Чарцоў.

Кошт аднапакаёвай кватэры на Перадавой вуліцы складае сёння блізу 43 тыс. даляраў, двухпакаёвай - у раёне 50 тыс. Нізкія кошты на жыллё тлумачацца яе размяшчэннем уздоўж Менскага трактарнага завода і чыгуначных шляхоў. Завадскія выкіды і пастаянныя шумы не лепшым чынам адбіваюцца на прывабнасці вуліцы, адной з нямногіх добрых якасцяў якой выступае адносная блізкасць да цэнтру горада. Яшчэ адзін фактар - якасць самога жылля: вуліца забудавана дамамі 70-х гадоў пабудовы з кампактнымі кватэрамі.

Другое месца ў рэйтынгу займае вуліца Солтыса ў мікрараёне Дражня. Замыкае тройку яшчэ адзін прадстаўнік прамысловых кварталаў Менска - вуліца Клумава. Таннае жыллё лёгка знайсці на вуліцы стралковай, размешчанай непадалёк ад чыгуначнай станцыі «Менск-Усходні». За ёй ідзе вуліца Мініна, уздоўж якой размешчаны Менскі завод сілікатных вырабаў і іншыя вытворчыя прадпрыемствы.

Нізкія кошты кватэраў таксама характэрныя для вуліц Шабаны і Ротмістрава, якія знаходзяцца ў адным з самых індустрыяльных мікрараёнаў горада. Акрамя таго, нядорага абыходзіцца жыллё на вуліцы Куляшова каля станцыі метро Аўтазаводская. Праблематычна прадаць кватэру па высокім кошце на вуліцы Ангарскай. У першую дзесятку самых «танных» вуліц Менска таксама ўвайшла вуліца Асаналіева, што размешчана блізу Менскага цагельнага завода «Керамін» і кальцавой дарогай. За аднапакаёвыя кватэры на гэтых вуліцах у сярэднім просяць 45 тыс. даляраў, за двухпакаёвыя - 53-55 тыс.

Практычна ўсе «танныя» вуліцы Менска размешчаныя паблізу прамысловых аб'ектаў. Недарагое жыллё ў асноўным сканцэнтраванае вакол Трактарнага завода, а таксама ў мікрараёнах Шабаны, Ангарская, Сярова і Дражня. Да таго ж кватэры з нізкімі коштамі шырока прадстаўленыя ў такіх спальных раёнах, як Серабранка, Навінкі, Чыжоўка, Ландэра і Лошыца. Агулам больш за ўсё танных кватэр размешчана ў Заводскім і Партызанскім раёнах.

Асноўны фактар прывабнасці вуліцы - яе месцазнаходжанне. Вялікім попытам карыстаюцца месцы з развітой транспартнай і сацыяльнай інфраструктурай (крамамі, школамі, дзіцячымі садамі, паліклінікамі), тады як рэзка зніжае сярэдні кошт «квадрата» на вуліцы суседства з буйным заводам і чыгуначнымі шляхамі. Па гэтай прычыне наўрад ці можна назваць прэстыжнай якую-небудзь забудову ў раёне дзеючага завода.

Нізкія кошты на жыллё таксама звязаныя з дамамі старой пабудовы. «На такіх вуліцах часта сустракаюцца кватэры з невялікімі пакоямі, нізкімі столямі і ў дрэнным стане - такім чынам, усё гэта адбіваецца на іх кошту. Пасля куплі такога жылля яшчэ трэба выдаткавацца на рамонт. Пры гэтым новабудоўлі на самых «танных» вуліцах горада сустракаюцца вельмі рэдка», - растлумачыў Арцём Чарцоў.

У той жа час у Менску не існуе ярка выяўленага падзелу горада на багатыя і бедныя кварталы, як, напрыклад, у Парыжы, Нью-Ёрку ці Рыа-дэ-Жанейра. «У Менску, вядома, існуюць вуліцы і раёны, рынкавы кошт кватэр у якіх ніжэй, чым у сярэднім па горадзе, аднак попыт на жыллё прысутнічае ў розных частках горада - нейкіх «паміраючых» кварталаў у ім няма», - адзначыў экспэрт.

Кватэры на «танных» вуліцах у асноўным набываюць удзельнікі «ланцужкоў». «Калі сям'і раз'язджаюцца, ім неабходна атрымаць замест адной прасторнай дзве кампактныя кватэры, для чаго прыходзіцца згаджацца на жыллё ў не самім прывабным месцы. Акрамя таго, могуць быць пераезды ў межах аднаго раёна - звычайна ў кватэры большых плошчаў. Сустракаюцца і «чыстыя продажы»: кватэры нярэдка набываюць іншагароднія», - дадаў прадстаўнік агенцтва нерухомасці.

Раней экспэрты «Тваёй сталіцы» склалі рэйтынг 30 самых дарагіх жылых вуліц Менска. Першае месца ў ім заняла вуліца Піянерская, кошт «квадрата» ў якой дасягае 4500 даляраў. Высокія кошты абумоўленыя дамамі павышанай камфортнасці і прылеглай грамадска-дзелавой забудовай: спорткомплекс «Менск-Арэна», бізнэс-цэнтр са SPA Riviera Plaza і гандлёвым цэнтрам «Арэна-Сіці». У пяцёрку таксама ўвайшлі вуліцы Язмінавая, Цяплічная, Парніковая і Ваньковічаў у квартале за Нацыянальнай бібліятэкай.

Рэйтынгі складзеныя аналітыкамі групы кампаній «Твая сталіца» на аснове экспэртнай ацэнкі і звестак маніторынгу прапановы і фактычных коштаў угод з жыллём на другасным рынку. Крытэрыем для ранжыравання выступіў сярэдні кошт 1 кв. м на той ці іншай вуліцы беларускай сталіцы. У выбарку не патрапілі невялікія вуліцы і завулкі, прапановы паводле якіх прадстаўленыя адзінкавымі аб'ектамі.