Юнкер і Магерыні прыедуць у Кіеў 30 сакавіка
1- 24.03.2015, 20:25
- 5,872
Стала вядомая дата першага замежнага візіту кіраўніка Еўракамісіі.
Украіну з афіцыйным візітам 30 сакавіка наведае высокапастаўленая дэлегацыя Еўрапейскага Звязу. У яе складзе будуць прэзідэнт Еўракамісіі Жан-Клод Юнкер і кіраўніца дыпламатыі Федэрыка Магерыні, піша "Інтэрфакс".
"30 сакавіка прэзідэнт Еўрапейскай Камісіі Жан-Клод Юнкер супольна з Высокім прадстаўніком ЕЗ у замежных справах і палітыцы бяспекі Федэрыкай Магерыні зробяць візіт ва Украіну", - паведаміў спікер МЗС Украіны Яўген Перабійніс на брыфінгу ў Кіеве ў аўторак, 24 сакавіка.
У рамках візіту плануецца абмеркаваць увесь комплекс двухбаковых стасункаў Украіна-ЕЗ. Спікер МЗС Украіны распавёў, што ўкраінская старана, у сваю чаргу, плануе абмеркаваць пытанні, звязаныя з аднаўленнем бяспекі, стабільнасці, тэрытарыяльнай цэласнасці Украіны, а таксама пытанні аб стане выканання менскіх дамоўленасцей, разгортванні на тэрыторыі Украіны міжнароднай аперацыі ў падтрымку міру і бяспекі (увядзенні міратворцаў).
Акрамя таго, паведаміў Перабійніс, будзе падымацца пытанне аб правядзенні ў красавіку ў Кіеве Міжнароднай канферэнцыі аб падтрымцы рэформаў ва Украіне (канферэнцыі донараў - рэд.). Раней дата візіту кіраўніка ЕК увесь час пераносілася. Аднак пасля перамоў у Менску ў сярэдзіне лютага на ўзроўні прэзідэнтаў "нармандскай чацвёркі" актыўныя вайсковыя дзеянні на Данбасе спыніліся.