Пасол Беларусі ва Украіне: Ніводзін беларус не загінуў на Данбасе

Амбасада Беларусі не мае такіх звестак.

Пра гэта заявіў амбасадар Беларусі ва Украіне Валянцін Вялічка ў інтэрв'ю«Українським Новинам», адказваючы на пытанне аб удзеле беларусаў у баявых дзеяннях на Данбасе.

«Ёсць вярбоўшчыкі, якія прапануюць, мяркуючы з усяго, зарабіць. Але нармальныя людзі на вайну не паедуць. Калі ў мяне сям'я, уладкаваны побыт, праца, дык выбачайце мяне - куды я паеду? Гэта ж вайна.

Прыкладаў, калі б беларусы ваявалі на чыім-небудзь баку на ўсходзе Украіны і загінулі, мы не ведаем», - заявіў ён.

Вялічка таксама заявіў, што не ведае, ці ёсць расейскія вайскоўцы на Данбасе: «Гэта не да мяне пытанне. Сказаць, што ёсць - значыць, трэба мець доказы, а якія? Я на Данбасе не быў, я гляджу тэлевізію, як і ўсе. Адны кажуць, што ёсць, іншыя - што не».

Што тычыцца планаў пачаць вяшчанне ў Беларусі ўкраінскага тэлеканала, то, са слоў Вялічкі, праца над гэтым вядзецца.

На пытанне, ці супрацоўнічае Беларусь з «уладамі Данецкай і Луганскай абласцей» у эканамічным плане, Вялічка адказаў: «Як можна з імі супрацоўнічаць? Ніякай выгады няма».