«Палатачнік»: У студэнцтве стала ўдзельнічаў у святкаванні Дня Волі
9- 25.03.2015, 17:12
- 10,856
«Дэпутат» Валерый Барадзеня прызнаўся, што раней хадзіў на шэсці ў Дзень Волі.
Пра гэта «дэпутат» «палаты прадстаўнікоў», кандыдат эканамічных навук Валерый Барадзеня заявіў у інтэрв'ю «Еўрарадыё».
«Калі я быў студэнтам, то стала браў удзел у апазіцыйных мерапрыемствах, - са смехам прызнаецца Валерый Барадзеня. - Асабліва ў тых, якія праводзіліся на Дзень Волі. Сёння я, вядома, не буду, але ў кожным выпадку трэба ставіцца да сваёй гісторыі з павагай. Гэта была выбітная дата і выбітная падзея - што Беларуская Народная Рэспубліка была створаная».
І сур'ёзна папярэджвае: «Калі мы не шануем гісторыю, то яна помсціць вельмі жорстка».
Будучага «парламентарыя» за ўдзел у «апазіцыйных» акцыях ні разу не затрымлівалі. Сёння свае студэнцкія «палітычныя свавольствы» ён тлумачыць па-філасофску: «Калі ты ў 18 гадоў не рэвалюцыянер, а ў 40 не кансерватар, то ты дурань!»
Як у чалавека, які браў удзел у шматтысячных акцыях на Дзень Волі, журналіст пацікавіўся ў Валерыя Барадзені: чаму гэта мерапрыемства збірае толькі некалькі сотняў удзельнікаў? На гэты раз адказ не здзіўляе: вінаватыя ў гэтым лідары апазіцыі.
«Тыя, хто арганізоўвае гэтыя мерапрыемствы, спрабуюць іх ідэялагізаваць, палітызаваць і выкарыстоўваць на сваю карысць. Але інтэрпрэтацыя фактаў гісторыі з пункту гледжання дня сённяшняга - гэта недарэчна. Асабліва, калі мэта - атрымаць нейкія палітычныя дывідэнды. Мерапрыемства (святкаванне Дня Волі) важнае, але калі арганізатары не зразумеюць, што проста так у нашым інфармацыйным стагоддзі не перанясеш ідэалогію з дапамогай такіх простых метадаў у масы, туды людзі наогул перастануць хадзіць», - заявіў «палатачнік».