Даля Грыбаўскайтэ: Краіны Балтыі павінны быць гатовыя абараняцца

Сёння захаванне свабоды стала рэальным выклікам для краін Балтыі.

Прэзідэнт Літвы Даля Грыбаўскайтэ на каўнаскай плошчы Адзінства (Венібес) ля Вайсковага музея вітала кадэтаў школы ім. генерала Павіласа Пляхавічуса і прыняла іх прысягу, піша ru.delfi.lt.

"Сёння, калі захаванне свабоды стала рэальным выклікам, ваша рашучасць служыць Літве яшчэ больш умацоўвае наша пачуццё адзінства. Яно падахвочвае верыць, што нас нельга зламаць, бо мы заўсёды будзем прымаць на сябе абавязанні ў абароне Радзімы", - сказала прэзідэнт.

Са слоў кіраўніцы краіны, гэта абавязанне маладых кадэтаў перад Літвой усведамляецца як найважнейшая мэта, якая гуртуе ўсіх, а таксама як прыкмета адвагі, самааддачы і грамадзянскай сталасці.

Для большасці маладых кадэтаў гэтая прысяга - першая ў жыцці. Яна, са слоў прэзідэнта, азначае - ісці складаным, але годным шляхам. Гэта магчымасць стаць прыкладам для іншых маладых людзей.

Кіраўніца краіны пажадала вучням праяўляць цярпенне, а таксама заўсёды верыць і ганарыцца сваёй радзімай.

21 год таму назад школа была створаная на грамадскіх пачатках гурткоў маладога байца, у 2012 г. яна стала агульнаадукацыйнай школай. Гэта адзіная такая школа ў нашай краіне, у якой вучаць кадэтаў-пяхотнікаў. У ёй вучацца 323 вучні. У гэтым годзе прысягнуць 115 юнакоў.

Краіны Балтыі павінны быць гатовыя абараняцца самастойна, каб ім дапамаглі партнёры па NATO, сказала прэзідэнт Грыбаўскайтэ.

"Калі мець на ўвазе геапалітычную сітуацыю ля межаў краін Балтыі, важна, каб краіны Балтыі перш за ўсё былі гатовыя абараняць сябе самастойна і толькі тады прасіць і чакаць, пакуль падаспеюць на дапамогу партнёры па NATO", - сказала прэзідэнт журналістам у Каўнасе.

"Калі мы, краіны Балтыі, не будзем гатовыя абараняцца самастойна, ніхто не прыйдзе, бо мы не можам прасіць немца прыйсці абараняць Літву ці Латвію, калі нашы людзі не гатовыя і не ідуць абараняць сваю краіну. Такім чынам, перш за ўсё нам варта выканаць "хатнюю працу", каб мы самі былі гатовыя, і толькі тады чакаць партнёраў", - дадала яна.